Nëse ka diçka që i japim shumë rëndësi në jetën e përditshme, veç paraqitjes, është: ushqimi, ajo çfarë hamë. Shqiptarët kanë nisur të kuptojnë vitet e fundit se ushqimi tregon statusin social, stilin e jetesës dhe mirëqenien tonë.
Të hash në mënyrën e duhur ka dëshmuar se na jep një ndjesi lumturie, po aq sa edhe një zemër e mendje të shëndetshme. Të rinjtë shqiptarë dhe jo vetëm, kanë nisur të frekuentojnë sa vjen e më shumë ushqimet në restorante, pra të hanë jashtë shtëpisë.
Por sa të kujdesshëm janë ata që na shërbejnë, që të kënaqin shijet tona? Disa prej nesh mund të ketë qenë kuriozë për të njohur personin, që i ka gatuar me aq dashuri atë që po konsumon. Në fakt ushqimi është një art, është kënaqësi e lumturi që nuk e zëvendëson me asgjë tjetër, por edhe s’mund ta shprehësh përmes fjalëve. Askush më mirë se sa një “Master Chef” nuk mundet që t’i ofrojë të gjitha emocionet në një pjatë.
Najada Frashëri ka marrë titullin si “Master Chef”-ja më e re në botë, por në fakt nuk është e re në këtë profesion. Ajo është personi i fshehur pas disa prej pjatave më të shijshme, që kanë provuar njerëz të thjeshtë në Itali, njerëzit e shquar në Francë apo personi që u kujdes për gjithçka që u shërbye në darkën në Presidencë.
E ndihmuar nga konsulenca dhe eksperienca e kuzhinierëve më të mirë në botë pjesë të shoqatës “Chaine Des Rotisseurs”, Najada ishte shqiptarja e vetme që u nderua këtë vit me titullin më të lartë “Master Chef” dhe që u bë pjesëtare e saj me statusin “Këshilltare e Kuzhinës”. “Chaine Des Rotisseurs” është një Shoqatë Ndërkombëtare e Gastronomisë e themeluar tashmë në mbi 80 vende, që prej vitit 1248 në Francë nga rostiçierët e parë. Qëllimi i shoqatës është të bashkojë personat që ndajnë të njëjtat cilësi, inkurajimin e artit të kuzhinës dhe kënaqësitë e tryezës.
Ndërsa ndan momentin e marrjes së titullit, Najada shprehet për rëndësinë që pati ky titull:
“Për mua është arritja e objektivit dhe qëllimit profesional e personal. Është nder, që shoqata më e lashtë në botë më ka njohur këtë meritë dhe më ka dhënë këtë çmim. Të kesh titullin si “Master Chef”, Il Cavalierato dhe titullin “Këshillues kuzhine” nga shoqata e parë ndërkombëtare është vlerësim për profesionalizmin dhe formimin tim. Vazhdoj të punoj me dashuri”.
Nga ana tjetër Frashëri na kujton rëndësinë e një pjate të bërë me dashuri dhe me produktet e duhura. Lajmet e pakëndshme për pakënaqësitë e shërbimit dhe efektet anësore të ushqimeve, të servirua jashtë datës së skadencën kanë mbushur prej kohësh portalet shqiptare. Ajo që kuzhinerët dhe shefat e kulinarisë nuk duhet të harrojnë është morali.
“Kuzhina është sektor i veçantë me përgjegjësi morale dhe etike. Njerëzit që nga fëmijëria janë ushqyer e rritur falë ushqimit të përgatitur nga mamatë. Duke u rritur “harrohet” ky lloj i lidhjes, por në të vërtetë ushqimi konsiderohet si përkëdhelje dhe mirëqenie për njerëzit. Kuzhinieri duhet të studiojë dhe të praktikohet për t’u dhënë më të mirën njerëzve, që janë të ngarkuar nga stresi dhe përreth 30/90 minuta duan të qetësohen dhe të rimarrin energji. Përpiqem të përkushtohem dhe të jap dashuri në ushqimet që përgatis, për të komunikuar dhe bashkëvepruar me atë që më zgjedh, midis disa kuzhinierëve e restoranteve dhe klienti që më zgjedh mua meriton të trajtohet me respekt dhe të shpërblehet. Kush paguan “sakrifikon” parat e tij dhe nuk mund t’i serviret pjatë e thjeshtë makaronash. Do të ishte i shëmtuar si gjest, i ftohtë dhe shenjë indiferentizmi”, shprehet Najada për “Iconstyle.al”.
Por rikthimi i saj në atdhe nga Italia ka një qëllim. “Master shef”-ja shqiptare ka shërbyer edhe për konsulencë në rimëkëmbjen e restoranteve dhe kuzhinave italiane në prag falimentimi, për të cilën gjeti si zgjidhje bashkëpunimin me “Sistemin Orved”.
“Unë zgjodha teknologjinë novatore të “Sistemit Orved” dhe erdha në Shqipëri me qëllimin e informimit dhe për ta bërë gatimin më të lehtë dhe më cilësor. Ai ofron zgjidhjen ideale për kursim në kohë, në forcë pune dhe sidomos në para, ruajtjen e gjatë në kohë të produkteve, të gatimeve gjysmë të përgatitura, si dhe ato të përfunduara. Ëndrra ime ishte ti sillja Tokës sime, njerëzve të mi, të gjithë eksperiencën, dashurinë dhe pasionin tim për kuzhinën. Dëshira ime më solli këtu për ta ngritur gjithmonë e më lartë nivelin e gatimit duke bashkuar komponentë të rëndësishëm, dashurinë për gatim e përvojën e fituar nga shef me tituj të lartë dhe risinë në teknologji”, tregon për një nga zgjidhjet më të shpejta dhe të lehta që do të harrojnë problemet e restoranteve dhe të klientëve.
Pavarësisht se nuk jetuar prej vitesh në atdhe, ajo i ka shërbyer të dyja vendeve. Najada na sjell ndërmend darkën e shtruar më 25 janar të këtij viti për ish-kreun e shtetit, Bujar Nishanin dhe figurat më të shquara të vendit. Tregon detajet që ndërthuri mes tradicionales dhe modernes, por të sjellë përmes një stili shumë elegant e njëherësh unik.
Por mbi të gjitha faktin që kjo darkë u shtrua nga ana e saj për të mbledhur fonde për restaurimin e operës në Amatrice, të dëmtuar nga tërmeti i fuqishëm që përfshiu qytetin më 24 gusht të 2016-s.
Pas së cilës u nderua me titullin “Ambasadore “ nga Shoqata e Ushqimit dhe Mirëqenies.
Tashmë me një qëllim të qartë për atë që do të bëjë, Najada shprehet optimiste për frymën e re të mënyrës së të ushqyerit që por sjell në Shqipëri.
“Sektori i ushqimit e pijeve është duke u përhapur në Shqipëri, sepse njerëzit janë kuriozë të dinë se çfarë hanë dhe sesi hanë. Shoh që ka shumë informacion, por në krahasim me botën, Shqipëria është akoma mbrapa. Duhet që kultura për ushqimin të fillohet të merret nga baza dhe me profesionalizëm. Informacionet që gjenden, si në të gjithë botën duhet të dihet të seleksionohen, për të kuptuar se çfarë është e vërtetë dhe e mirë, si dhe çfarë shërben për reklamim”, pohon “Master Chef”-ja.
Ndaj mendojmë se na duhen njerëz të tillë, që e duan atë që bëjnë dhe që mundohen të sjellin më të mirën për ne.
Burimi: Iconstyle.al
