Stafet spitalore, edhe këtë vit, do të jenë në gatishmëri natën e ndërrimit të viteve, teksa këtë e ka bërë me dije ministrja e Shëndetësisë Albana Koçiu, e cila e vuri theksin dhe tek urgjencat pediatrike për fëmijët.
Ajo tha se janë 4 qendra shëndetësore në Tiranë që do e ofrojnë këtë shërbim gjatë ndërrimit të viteve:
“Janë 4 qendra shëndetësore në Tiranë, të cilat do të ofrojnë urgjencën pediatrike për të gjithë të vegjlit. Pra, kushdo që ka një urgjencë pediatrike me fëmijët e tij, t’i drejtohet qendrave shëndetësore do të jenë të hapura 24 në 7 përgjatë gjithë sezonit, jo vetëm gjatë fundvitit. Qendrat shëndetësore që janë të hapura, ajo Nr.6 në Kombinat, Qendra Shëndetësore Nr.7 pranë Oxhakut, Qendra Shëndetësore Nr.8 pranë sheshit Wilson apo Tiranës së Re dhe Qendra Shëndetësore.”
Po ashtu ministrja bëri me dije se në të gjithë vendin, natën e ndërrimit të viteve do të jenë në shërbim 2 mijë mjekë dhe infermierë:
“Do të jenë në gatishmëri të gjitha strukturat shëndetësore në të gjithë vendin, përfshirë këtu spitalet rajonale dhe bashkiake, por jo vetëm edhe strukturat e sistemit parësor. Janë 31 struktura të sistemit parësor që do të jenë në gatishmëri përgjatë festave të fundvitit. Janë afro 2 mijë personel shëndetësor, mjekë dhe infermierë të cilët do të jenë në gatishmëri për të shërbyer për çdo nevojë që mund të kenë qytetarët gjatë ndërrimit të viteve.”
