Institucionet arsimore do të mbyllen për dy javë pasi dy rastet e para me Koronavirus u konfirmuan në vendin tonë.
Lajmin e bëri të ditur kryeministri Edi Rama në mbledhjen e jashtëzakonshme të qeverisë. Kreu i qeverisë përmendi edhe pezullimin e fluturimeve drejt veriut të Italisë dhe drejt zonave të kuqe, deri më 3 prill.
“Në këtë situatë si në çdo situatë ku përballemi me një gjendje jo të zakonshme, thelbësore është vetëpërmbajtja dhe ndjekja e një burimi të certifikuar dhe zbatimi i atyre orientimeve që burojnë nga nevoja për të kontribuar për veten dhe për të tjerët. Ne kemi vendosur në dispozicion të situatës financat përkatëse dhe një fond tjetër prej 400 milion lekësh, për të plotësuar nevojat e kësaj faze të mbështetjes së sistemit tonë shëndetësor.
Kemi gjetur mirëkuptimin dhe angazhimin maksimal të personelit mjekësor, e gjithë struktura e personelit shëndetësor që është parashikuar për tu futur hap pas hapi në dispozicion të kësaj përballje është e mirëinfirmouar. Ka ardhur momenti gjithnjë në ndjekje të protokollit të OBSH, janë pezullimi i udhëtimeve me Italinë e veriut deri në 3 prill. Mbyllja e institucioneve arsimore për një periudhë 2 javore”.
Kreu i qeverisë tha gjithashtu se ka ardhur momenti për mbylljen e aktiviteteve dhe anulimin e grumbullimeve masive, aktivitete sportive, kulturore, deri në 3 prill.
Rama theksoi se duhet qetësi dhe vetëpërmbajtje pasi armiku më i madh nuk është Koronavirusi por paniku.
“Asnjë panik, asnjë ekzagjerim në emocione negative. Kujdes, qetësi, vetëpërmbajtje. Nuk është një virus që po të zuri të mori jetën. Është një virus që ka karakteristikën e të panjohurës, por referuar statistikave është një situatë e vështirë për shkak të të panjohurës, por jo një situatë ku po kërcënohet e ardhmja e njerëzimit. Duhet ta ndjekim me shumë qetësi”, u shpreh kryeministri Edi Rama.
Në orët e para të ditës së sotme, ministria e Shëndetësisë konfirmoi se babë e bir kanë rezultuar pozitiv me Koronavirus. Bëhet fjalë për dy raste të importuara nga Fierence, të cilët kanë ardhur në Shqipëri përmes pikës Kufitare të Hanit të Hotit. 28-vjeçari ka hyrë në Shqipëri në datën 26 shkurt dhe ka infektuar edhe babanë e tij.
/Iconstyle.al
