Policia ka arrestuar pronarin e lokalit në zonën e ish-Bllokut, Redi Popesku rreth 17 ditë pas ngjarjes së rëndë, ku humbi jetën edhe një person, ndërsa dy të tjerë u plagosën. “Ballkanweb” raporton se ai është arrestuar dje, për veprime që pengojnë zbardhjen e së vërtetës.
Mesa duket, dëshmia e dhënë nga Popesku, i cili ishte dëshmitari i vetëm i ngjarjes, ka ngatërruar më shumë policinë. Ai është arrestuar nën akuzat e dëshmisë së rremë, si dhe fshehjes së armës së krimit të përdorur nga Ervis Martinaj, menjëherë pas ngjarjes.
Redi Popesku në dëshminë e tij e dhënë disa orë pas ngjarjes së rëndë, ka thënë se fillimisht Ervin Mata kishte kërkuar takimin me Martinaj për të sqaruar një konflikt mes tyre.
“Mesa kuptova ka qenë një konflikt ordiner për t’u sqaruar në lidhje me ngacmimin e së dashurës së Ervin Matës, Elvana Gjata. Gjithashtu dua të sqaroj momentin që para se të vinte Ervis Martinaj, mua më tha Ervin Mata, nëse e kisha problem që ai të vinte tek dyqani im. I thashë se nuk kishte problem, pasi Martinajn e kisha të njohur. Dua të sqaroj se të dy këta persona, si Ervin Mata dhe Ervis Martinaj u takuan normalisht dhe nuk dhanë asnjë shenjë për konflikt. Pra u takuan miqësisht dhe nuk kishin tendencë që të tregonte se situata do agravonte siç ndodhi”- është shprehur në dëshminë e tij Redi Popesku.
Në ngjarjen e rëndë të ndodhur mbrëmjen e 4 tetorit, humbi jetën Fabian Gaxha, ndërsa mbetën të plagosur Ervis Martinaj dhe Elion Hate.
Policia ka shpallur në kërkim Ervin Matën, Mevjol Bilon si dhe Fabio Allushin.
I arrestuar në Kakavijë në tentativë për t’u larguar:
-Geldo Hoti
Të plagosur dhe në masë arresti:
– Ervis Martinaj, 36 vjeç, banues në Tiranë
– Eljon Hate, 28 vjeç, banues në Shkodër
Në kërkim:
– Ervin Mata, 31 vjeç, banues në Tiranë ( I dashuri i Elvana Gjatës)
– Fabio Allushi, 42 vjeç, banues në Tiranë;
– Mevjol Bilo, 41 vjeç, banues në Tiranë; (Komando dhe truprojë i Elvana Gjatës, autor i dyshuar i vrasjes së Fabian Gaxhës)
