Mario Përlleshaj, autori i vrasjes së Martin Canit, u dënua me 16 vite burg, teksa babai i të ndjerit ka folur sot për “Shqipëria Live”. Ëngjëll Cani është shprehur se shkolla është shkaku i parë i kësaj ngjarjeje, pasi nuk i ka dërguar asnjë mesazh as për ta lajmëruar për sherrin që kishte ndodhur mes tyre.
“Shkolla është shkaktari i parë i kësaj ngjarje. Unë shkollën e kisha 5 minuta larg nga puna ku punoja. Një mesazh mund të shpëtonte jetë. Unë mund të shkoja ta merrja djalin. Një mesazh i tyre mund të kishte shpëtuar një jetë”, tha Ëngjëll Cani, babai i të Martinit.
Gazetarja Kristi Gongo gjatë diskutimit u shpreh se prindërit janë po aq fajtorë sa vetë autori, teksa në “Shqipëria Live” përmendi një shembull real që ka ndodhur në SHBA.
“Unë do të vlerësoja me shumë rëndësi duke marrë parasysh një rast që ka ndodhur në Miçigan, ku një 15-vjeçar vrau shokët e klasës. Bëhet fjalë për katër marrje jetë në moshën 15-vjeçare. Unë do të doja që drejtësia jonë të merrte këto shembuj, për çfarë e kam fjalën.
Për të gjykuar edhe prindërit e autorit të vrasjes së Martinit. Për mua janë po aq fajtorë sa vetë autori. Bëhet fjalë për një fëmijë që sikundër është gjykuar në rastin amerikan. Ata janë konsideruar prindër që kanë dështuar në prindërimin e tyre. Prindërit e autorit u dënuan me 10 vite vrasje të pavullnetshme megjithëse ata nuk e kanë shkrepur armën”, tha gazetarja Kristi Gongo.
Nga ana tjetër avokati i familjes Cani, Redi Ramaj, që ka ndjekur hap pas hapi çështjen, ka deklaruar se do ta dërgojnë çështjen në Gjykatën e Apelit, por jo vetëm.
“Pavarësisht dënimit përfundimtar me 16 vite, nuk kishin rëndësi për ne vitet, e rëndësishme është të bëhet drejtësi dhe të jepet mesazhi i qartë që drejtësia funksionon. Njerëzit janë më të pambrojturit.
Rastet më të fundit tregojnë se i kemi lënë fëmijët në mëshirë të fatit. Jemi në kushtet ku kemi gjetur një formë drejtësie.
Ministria e Arsimit duhet të kishte deklaratë të vazhdueshme rreth kësaj ngjarjeje, por nuk ka ndodhur. Duhet të ishin marrë masa rreth futjes së sendeve të paligjshme nëpër shkolla. Ju e thatë kemi pasur pengesa të mëdha. Shkolla nuk e ka raportuar ngjarjen për të mbrojtur emrin e shkollës, është për të vënë duart në kokë. Ata nuk kërkuan as ndjesë, nuk mbajnë përgjegjësitë e veta, e shmangën këtë ngjarje e bënë sikur s’ka ndodhur gjë. Kjo sjell ngjarje të tjera që tashmë janë të përsëritura. Ne kemi dështuar si shoqëri me këtë rast.
Do të kemi tjetër përballje në Gjykatën e Apelit. Do të ndjekim rrugën civile të dëmshpërblimit, dhe dëmshpërblimit të të gjitha institucioneve që janë përgjegjëse për vrasjen e Martin Canit”, tha avokati Redi Ramaj.
