Vijon të thellohet bilanci i të prekurve nga Coronavirusi, teksa ka shkuar në 3599 numri i viktimave në rang global, ndërsa 105,000 njerëz janë infektuar, shumica e tyre në territorin e Kinës.
Të prekur janë regjistruar në një pjesë të madhe të shteteve, ndërsa gjendja më alarmante paraqitet në shtetin fqinj, Itali, ku kanë humbur jetën 233 persona, ndërsa 5.883 të tjerë janë infektuar.
Së fundmi, kryeministri italian Giuseppe Conte nënshkroi një dekret, duke vendosur izolimin total të rajonit të Lombardisë, pasi kjo zonë ka numrin më të madh të të infektuarve.
Sipas këtij vendimi, qytetarët e kanë të ndaluar për të dalë nga rajoni, përveç rasteve emergjente.
Po ashtu, pjesë e këtij vendimi janë edhe Parma, Piacenza, Rimini, Reggio-Emilia, Modena, Pesaro dhe Urbino, Venecia, Padova, Treviso, Alessandria, Verbano-Cusio-OSSOLA, Novara, Vercelli dhe Asti, rajone këto që janë të banuara nga rreth 15 milionë banorë.
Ndërkohë, sipas autoriteteve vendase javën e ardhshme do nënshkruhet një dekret që parashikon masa më drastike, ku çdo person që do të kapet duke hyrë apo duke dalë nga Lombardia do të gjobitet me një shumë të majme.
Kjo gjendje do të zgjasë deri më 3 prill dhe dekreti parashikon gjithashtu ndalimin e të gjitha ngjarjeve publike, mbylljen e kinemave, teatrot, palestrat, diskot dhe baret.
Po ashtu, do ndalohet edhe kryerja e funeraleve, pasi rrezikon përhapjen e COVID-19.
Nga ana tjetër, në vendin tonë nuk është regjistruar ende asnjë person i prekur nga virusi i rrezikshëm, ndonëse ka patur disa raste të dyshuara që kanë rezultuar negative./gazetareforma
