Vetëm pak ditë na ndajnë nga nisja e sezonit të ri televiziv dhe tashmë janë bërë të ditura lëvizjet nga njëri ekran tek tjetri. Televizioni “Klan” është ai që duket se ka pasur lëvizjet më të mëdha duke bërë pjesë të tij shumë figura të reja.
Tashmë është zyrtare që “Apartamenti 2XL” është zhvendosur në “Tv Klan” ku do të sjellë programin e humorit të quajtur “Duplex”, i cili do të transmetohet të shtunave në orarin “prime time” duke zhvendosur emisionin e Ermal Mamaqit. Sikurse mësoi “iconstyle.al” emisioni “Xing me Ermalin” do të transmetohet po të shtunave, por në orën 22:00.
Gjithashtu edhe Alfio Rrotani dhe kolegu i tij Indriti, të cilët u bënë pjesë e këtij televizioni që në sezonin e kaluar, përflitet se do të moderojnë programin e mesditës në “Tv Klan”.
Ndërkohë që “Tv Klan” ka publikuar edhe promon paralajmëruese të emisioneve të reja është vënë re mungesa e Nevina Shtyllës dhe Arjola Shehut, edhe pse ato kanë deklaruar se do të vazhdojnë të jenë pjesë e këtij televizioni.
Gjithashtu vihet re edhe mungesa e moderatores Marina Vjollca, e cila sezonin e kaluar moderoi emisionin “C’est la Vie”. Përflitet se ky emision me shumë mundësi nuk do të vazhdojë në sezonin e ri pasi me sa duket nuk ka pasur shikueshmëri shumë të lartë.
Orarin e Marinës tashmë do ta zërë Turjan Hyska me emisionin “Familja”, i cili do të rivalizojë spektaklin e “Portokallisë”.
Megjithatë ende nuk dihet nëse Marina do të rikthehet përsëri në janar, apo nëse do të jetë apo jo pjesë e këtij ekrani. Ndërsa nga ana tjetër dihet se motrës së saj Luanës i është besuar sërish emisioni “Shiko kush Luan” në “Top Channel”, pasi sezoni i parë rezultoi i suksesshëm.
