Janë zbardhur sot disa detaje të reja nga rrëmbimi i Alvin Berishës në Siri nga nëna e tij, Valbona.
Ajo ishte një shtëpiake e thjeshtë që jetonte bashkë me familjen në Barzago të Italisë.
Pasi ra në kontakt me videot e propagandës së Shtetit Islamik në internet, Valbona vendosi të braktiste familjen, burrin dhe dy vajzat 11 e 10 vjeçe e të transferohej në Siri duke marrë me vete djalin që ai të ndiqte fatin e tij e të rritej si luftëtar i grupit xhihadist.
Bashkëshorti Afrim komunikonte në telefon me të dhe i kërkonte që të kthente Alvinin, sipas “Corriere-s”, por Valbona ishte përgjigjur:
“Për të vdekur kemi gjithsesi“.
Në mesazhet e shkëmbyera me të atin, 11-vjeçari thoshte se dëshironte të largohej nga Siria, por e ëma nuk e linte:
“Po dua, por mami nuk më lë. Ajo është veshur si ninxha”, i shkruante ai të atit.
Valbona ndërroi jetë në Siri bashkë me partnerin e saj atje, pas një sulmi ajror.
/Top Channel
