Në episodin e fundit të emisionit “Vitality Vibes” me Ilvi Begollin, Taulant Stërmasi, presidenti i Federatës Shqiptare të Atletikës, atletja Luiza Gega dhe Relaksa Dauti ndanë mendimet e tyre mbi sfidat dhe arritjet në atletikën shqiptare.
Stërmasi, i pyetur për vështirësitë në motivimin e sportistëve shqiptarë, theksoi se rruga për t’i bërë ata të arrijnë nivelin elitar është sfiduese dhe kërkon ndryshim të perceptimeve.
Ndërsa, Luiza Gega, atletja që spikat për shpejtësinë dhe qëndrueshmërinë e saj në disiplinën e garave me pengesa, rrëfeu përvojën e saj të kalimit në këtë fushë.
“Unë kam filluar jo me pengesa fillimisht. 2016 ka qenë viti kur unë kalova për ta provuar si disiplinë, sepse trajneri mendonte që unë mund të jepja më shumë. Se fiziku im jep shumë më tepër kryesisht në metra të lartë, që do të thotë jam rezistente. Kam një kapacitet të mirë aerobik, që më vjen natyrshëm dhe pa shumë stërvitje kap rezultate shumë të mira në metra lart, e quajmë 3 mijë metra, 5 mijë, 10 mijë”, u shpreh Gega.
