Me siguri të gjithëve ju kujtohet Luar Arani, vajza me zërin e ëmbël e cila na bëri për vete menjëherë në këngën e famshme të Flori Mumajesit, “Gjithmonë”.
Por ç’ka ndodhur me të për kaq shumë kohë dhe a është tërhequr nga muzika? Në fakt, përgjigjia është jo! Ajo nuk ka hequr dorë dhe po rikthehet fuqishëm në një bashkëpunim me këngëtarin e dashur shqiptar, Ermal Fejzullahu.
Këtë e bëri të ditur vetë artisti në një intervistë për emisionin “NIN”, ku u shpreh i bindur se kjo këngë do të pëlqehet shumë pasi me këtë projekt ai do të rikthehet tek stili me të cilin e ka nisur karrierën.
“E kam edhe një bashkëpunim me një këngëtare shumë të mirë. Ajo është Luar Arani që prej disa vitesh është zhdukur nga skena. Ajo ka pasur disa këngë shumë të mira dhe është artiste shumë e mirë, të cilën e vlerësoj shumë. E kemi bërë një bashkëpunim. Është një këngë shumë e mirë, shumë fisnike. Jo gjithmonë me ndjek vetëm këngë tregut. Unë gjithmonë kam qejf për t’u rikthyer tek ajo që e kam filluar karrierën dhe e di që kjo këngë ka për t’u vlerësuar shumë mirë. Nuk është se kemi caktuar ndonjë datë, varet nga situata”, është shprehur Ermali.
Epo s’na mbetet gjë tjetër veçse të presim hitin e padiskutueshëm nga dyshja.
Kujtojmë se Luar, para disa muajsh iu rikthye sërish muzikës dhe erdhi me këngët “Ditë e Natë” dhe “Jetë”, të cilat u pritën mjaft mirë nga publiku.
Artistja u bë e njohur me bashkëpunimin me Flori Mumajesin “Gjithmonë”, por kjo nuk është kënga e saj e vetme në gjithë karrierën muzikore.
Në Maj 2008, Luar mori pjesë në Top Fest 5 me këngën “Film Premiere”.
Më datë 19 korrik 2012, Luar publikoi videoklipin “Remember”.
Pas një mungese relativisht të gjatë në tregun muzikor, Luar vendos t’i rikthehet sërish muzikës dhe në verën e vitit 2017, merr rrugën drejt Kosovës për të realizuar projektin e rikthimit të saj.
Më datë 17 tetor 2017-të, Luar publikon videoklipin “Si Dje”. Muzika e këngës u punua nga Cricket, ndërsa teksti u shkrua nga vetë Luar.
Pas një viti, këngëtarja publikoi videoklipin “Mykonos”.
Ndërsa në nëntor 2019-të, Blleki, Mc Kresha & Luar publikojnë videoklipin “Thug Life”. Muzika e këngës u punua nga K-Master, ndërsa teksti u shkrua nga Mc Kresha, Blleki & Luar.
