Eni Çobani ka folur së fundmi për lajmet e rreme që qarkullojnë kudo nëpër internet. Mirëpo së fundmi qarkulloi një lajm në portale ku thuhej se ajo kishte ndërruar jetë.
Sërish, Eni Çobani foli rreth kësaj teme edhe në programin “Wake Up”.
Ndër të tjera, gjatë fjalës së saj ajo tha se do të presë edhe këtë javë që të hiqen lajmet. Nëse nuk do të fshihen, atëherë ajo ka vendosur që të shkojë në gjykatë.
“Nuk e di fare se kush janë! Do të mbaj fjalën që kam thënë që do të lejoj këtë javë të shikoj veprimin që ata do kryejnë. Dhe ditën e hënë kam vendosur që të paraqitem vetë në Prokurorinë e rrethit gjyqësor Tiranë për të filluar unë vetë. Nëse duan mund të më bashkohen edhe shumë të tjerë që më kanë telefonuar, kryesisht njerëz publikë. Unë jam e mirëpritur t’i përfaqësoj edhe ata, sepse kjo gjë duhet të marrë fund. Nuk mund të bëhen të tilla lajme negative dhe që sjellin negativitet,”ka thënë juristja.
Gjithashtu ajo zbuloi se sa shumë u hidhërua kur pa nënën e saj me lot në sy pas këtij lajmi të rremë.
“Ka javë që qarkullon ky lajm, nuk kisha hyrë për ta parë duke menduar që ky lajm nuk është i vërtetë. Por dy gjëra më kanë prekur deri në atë njoftim publik; telefonata e një ish-protagonisti të ‘Shihemi në gjyq’, nuk isha dëgjuar me të prej kohësh, quhet Fadil. Më merr në mëngjes dhe i drejtohem me emrin e dikujt tjetër dhe më thotë që jam Fadili. Më tha, tani jam i qetë që të dëgjova zërin sepse po qarkullon një lajm që nuk jeni më në jetë. Jam trishtuar! Pas kësaj, prekja e nënës sime. Unë kam nënën gjallë dhe është në një moshë të madhe. Lotët në sytë e saj më prekën shumë”, theksoi juristja.
