Dafina Zeqiri ka qenë ndër të parët personazhë të shoëbiz-it që ka uruar publikisht presidenten e sapozgjedhur të Kosovës, Vjosa Osmani.
Ylli i muzikës ka publikuar një foto të Osmanit, krahas së cilës ka zgjedhur fjalët më të bukura për ta uruar për postin që ka marrë.
“Vajzat e kanë vendin vetëm aty ku vetë dëshirojnë. Çdo gjë është e mundur dhe mund të bëhet realitet! Urime Vjosa Osmani. Urime Kosovë. #dearpresident #womanempowerment”, ka shkruar këngëtarja.
Vjosa Osmani mori 71 vota në një garë me Nasuf Bejtën, duke fituar kështu besimin e Kuvendit të Kosovës për të qenë në krye të shtetit për një mandat pesëvjeçar. Ajo fitoi në raundin e tretë të votimit.
Në dy raundet e para, asnjëri nga kandidatët për president, Vjosa Osmani dhe Nasuf Bejta, nuk arritën të marrin 80 votat e nevojshme.
Në sallë ishin të pranishëm 84 deputetë dhe në raundin e parë të votimeve morën pjesë 81 deputetë.
Osmani është e martuar dhe ka dy vajza. Para se të bëhet presidente, ajo ushtroi detyrën e shefes së shtetit pasi Hashim Thaçi dha dorëheqjen.
Si zgjidhet presidenti në Kosovë
Sipas Kushtetutës, që një person të zgjidhet president i Kosovës, në dy raundet e para të votimit duhet të sigurojë dy të tretat e ulësve në Kuvend, pra 80 kartona jeshilë nga 120 në total.
Në raundin e tretë gjithçka lehtësohet, pasi president zgjidhet ai që merr shumicën e thjeshtë prej 61 deputetësh, por në votim duhet të marrin pjesë të paktën 80 deputetë. Nëse edhe raundi i tretë dështon, vendi shkon në zgjedhje të jashtëzakonshme të cilat duhet të mbahen brenda 45 ditësh.
