Miqtë e vetëm të Lori Hoxhës janë vetëm katër: mami, dy motrat dhe vëllai, të tjerët janë kalimtarë. Ajo tregoi mes të tjerash në një intervistë për emisionin “Guximtarët” marrëdhënien me familjen, veçanërisht me dy motrat e saj, Sarën dhe Redian.
Lori zgjodhi të fliste fillimisht për Sarën, duke qenë se janë shumë të afërta, por ajo që nuk ia prish asnjëherë qejfin duket se është motra e saj më e vogël.
“E dua shumë. Kemi marrëdhënien më të afërt, më mban me këmbë në tokë. Më kritikon gjithmonë. Unë mund të gaboj dhe të mendoj gabim, por ajo është gjithmonë e drejtë dhe e saktë.
Redia nga ana tjetër, që mban një profil më të ulët në rrjete sociale është e kundërta e Sarës. Nëse dua të bëj diçka, Redia më thotë bëje! Nuk më ndalon asnjëherë. Jam e balancuar mirë në familjen time”, shprehet Lori.
