Disa ditë më parë, Policia e Shtetit me anë të një njoftimi për shtyp ka ngritur alarmin duke njoftuar se është rishfaqur një tjetër lojë e rrezikshme në internet njëlloj sic ka qenë Balena Blu dhe Momo, lojëra të cilat kanë çuar drejt vetëvrasjes fëmijë dhe adoleshentë.
Loja e re quhet “Jonathan Galindo” i njohur edhe si “Cursed Goofy” dhe është një personazh i përshkruar si një njeri i veshur me një maskë qeni “Goofy” dhe është i lidhur me sfidën Balena Blu. Përdoruesit anonimë krijojnë profile duke përdorur emrin “Jonathan Galindo” dhe duke përdorur imazhe të ndryshme të “Cursed Goofy”, më pas iu dërgojnë mesazhe grave dhe fëmijëve nëpërmjet platformave të mediave sociale, duke i pyetur ata nëse dëshirojnë të luajnë një lojë.
Nëse personat të cilët kanë marrë mesazhet do të pranojnë të luajnë, kjo sfidë mund të zgjasë 50 ditë me 50 sfida të ndryshme dhe si përfundim sfida e fundit mund t’i çojë deri në shkaktimin e vetëvrasjes. Personat më të prekur janë fëmijët e moshave nga 10 deri në 18 vjeç, të cilët bëjnë pjesë dhe në grupet më të prekshme të shoqërisë.
Së fundmi janë denoncuar edhe rastet e para në Shqipëri. TV Klan raporton se në Linjën Kombëtare të Ndihmës për Fëmijë, “Alo 116”, kanë mbërritur 5 sinjalizime brenda 1 jave.
“Bëhet fjalë për një adresë, që është në Instagram, fëmijët janë kontaktuar nga e njëjta adresë. Disa biseda janë bërë në shqip, disa biseda janë bërë në anglisht. Pra akoma duhet parë se kush është personi që fshihet pas asaj adrese. Janë të grupmoshës 10 deri 16 vjeç që na kanë sinjalizuar”, -thotë për Tv Klan, Mirgit Vata nga “Alo 116”.
Faqja e denoncuar është mbyllur, por ende nuk është bërë i mundur identifikimi i personit. Sipas psikologes Moza Sula, më të rrezikuar janë fëmijët që kalojnë shumë kohë në internet apo ata që bëjnë një jetë të varfër sociale.
“Nëse ndryshon diçka në humorin e fëmijës, në rutinën ditore, në higjienën personale, nëse nuk është më i komunikueshëm si më parë… Eksplorimi në faqe të pakontrolluara mund ta bëjë fëmijën burim viktimizimi në çdo moment prandaj është shumë e rëndësishme të bëhet kontrolli nga ana e prindërve”, -shprehet ajo.
