Shqipëria ka zbritur me 2 vende në indeksin e lirive mediatike, sipas raportit të fundit të organizatës ndërkombëtare, “Reporterët Pa Kufij”.
Në 2020-n vendi ynë renditet në vend të 84-t mes 180 shteteve të botës, një rënie në krahasim me vitin 2019 kur sërish u listua 2 vende më sipër.
Sipas raportit, gazetarët kanë ende qasje të kufizuar te informacioni zyrtar, për shkak të vijës politike të qeverisë por edhe kontrollit që ushtrohet mbi televizionet nëpërmjet licensave të transmetimit.
“Në 2019-ën, qeveria rriti përpjekjet për të marrë nën kontroll mediet me justifikimin e luftës ndaj lajmeve të rreme. Shumica qeverisëse në dhjetor votoi në parlament paketën ‘antishpifje’, duke kufizuar liritë e shprehjes, të informacionit dhe të shtypit, përkundër praktikave më të mira,” theksoi organizata e gazetarëve në njoftimin e saj.
Situata është vështirësuar veçanërisht gjatë kësaj kohe kur vendi po lufton me pandeminë e koronavirusit, dhe mbështetja nga qeveria ka munguar.
“Gjatë krizës së koronavirusit, në mars 2020, kryeministri Edi Rama u bëri thirrje qytetarëve të mbrohen, mes të tjerave, edhe nga mediet. Sulmet fizike dhe paditë për shpifje që zyrtarët ngrenë kundër gazetarëve po ashtu mbajnë në vend klimën e pasigurisë dhe frikës, që bashkë me gjuhën denigruese të politikanëve, i kthen reporterët në objektiva të mundshëm agresioni. Ndërkohë autoritetet e vendit aspirojnë të hyjnë në Bashkimin Europian,” përfundon raporti i këtij viti për Shqipërinë.
Askush nuk po e vë ujin në zjarr për mediet, pavarësisht thirrjes së përsëritur të iconstyle.al (lexo këtu), reagimit të Shoqatës së Gazetarëve Europianë, apo Unionit të Gazetarëve, për nevojën e përfshirjes së tyre planin financiar për përballimin e krizës së shkaktuar nga koronavirusi në Shqipëri.
Mediat aktualisht janë në krizë, disa media audio-vizive dhe online kanë pezulluar përkohësisht pagat e gazetarëve, e të tjera kanë nisur reduktimin e pagave të disa punonjësve për të përballluar situatën.
Ndërkohë, Bosnja-Hercegovina renditet në një vend më të mirë se vendet e tjera të Ballkanit, atë të 58. Serbia zë vendin 93, Maqedonia e Veriut renditet e 92-a kurse Mali i Zi renditet më keq në vendin e 105-të. Kroacia zë vendin e 59.
