Dhjetori është muaji i zbukurimeve, vendimeve dhe harxhimeve! Nëse e keni zbukuruar tashmë Pemën e Vitit të Ri, duhet të dini që t’i shtoni diçka të re, një traditë e mbartur ndër vite. Nëse ende nuk e keni vendosur, atëherë ju kanë mbetur edhe shumë pak kohë.
Tradita e Pemës së Vitit të Ri mund t’ju bëjë konfuzë. Por gjithsecili ka mënyrën e tij të festimit dhe të zbukurimit të ambienteve, pavarësisht se zgjedh një bredh origjinal me objekte dekoruese luksoze apo një bredh artificial që kushton 2.500 lekë.
Strategjia që do të ndiqni mbetet në dorën tuaj, ndërsa “Iconstyle.al” mendoi që t’ju ndihmonte me disa informacione që duhet të dini lidhur me Pemën e Vitit të Ri dhe sa i kushton ajo familjeve shqiptare.
Pse i dekorojmë pemët?
Vendosja e pemës se Krishtlindjeve e ka zanafillën në shekullin 15 në Estoni, dhe më pas në Gjermaninë e Veriut në shekullin 16. Tradita është trashëguar deri në ditët e sotme. Ngritja e pemës së Krishtlindjeve paralajmëron ardhjen e festave të fundvitit që shoqërohen me oferta për blerjet. Pema e Krishtlindjeve është kthyer tashmë në traditë jo vetëm për shtëpitë, por edhe për lokalet. Sado e vogël qoftë, ajo gjithmonë sjell atmosferë.
Origjinale apo artificiale?
Ju mund të mendoni se një pemë artificiale është më e mirë për mjedisin, por gaboheni. Shumica e pemëve plastike vijnë nga Kina, kështu që kanë më shumë gjurmë karboni. Ndërsa një pemë origjinale lëshon oksigjen dhe absorbon CO2.
Origjinale dhe artificiale
“Një pemë artificiale prej 2 metrash lë një gjurmë të karbonit rreth 40kg CO2, 10 herë më shumë se bredhat origjinal”, thotë shoqata britanike e kujdesit të Pemëve të Krishtlindjeve.
Bredhat origjinale ndoshta janë më të mirë për mjedisin sesa ata artificial, sipas botanistit dhe profesorit të biologjisë, Clint Springer. Nëse doni të keni pemën e Krishtlindjes më miqësore me mjedisin, duhet të zgjidhni atë që ka ende rrënjët e bashkuar, që të mund ta rimbillni atë pas festave.
Nga ana tjetër, bredhat artificial janë prej plastike dhe metali, marrin shumë energji dhe burime për t’u prodhuar.
Tradicionale apo moderne?
Ka dhe preferenca mes pemës tradicionale me ngjyrë jeshile me pemën e bardhë, që njihet ndryshe si moderne dhe që simbolizon borën që bie përgjithësisht gjatë muajit dhjetor. Gjithsesi çmimet më të larta të pemës së bardhë, bëjnë që shqiptarët të zgjedhin tradicionalen.
Sa kushton në të vërtetë një pemë në Shqipëri?
Fillimisht duhet t’i keni ndarë me mendje dhe në praktikë, paratë që keni vendosur të shpenzoni për zbukurimet e shtëpisë suaj. Kjo varet nga buxheti familjar dhe sesa rëndësi i jepni ju atmosferës festive. Në këtë mënyrë caktoni edhe vendin se ku do ta blini.
Tregjet me blerje më të shumta janë ata që shesin mallra nga Kina, si “Tregu i Medresesë” apo ai i “Çamëve”. Gjithashtu edhe në dyqanet kushtuar dekorimeve të shtëpisë mund të gjeni me çmime të arsyeshme një Pemë të Vitit të Ri.
Nëse zgjidhni një bredh artificial atëherë mund të paguani nga 750 lekë deri në 25.000 lekë. Pema më e lirë që aktualisht shitet në tregun shqiptar është ai prej 750 lekësh, me një gjatësi prej 150 cm dhe dendësi prej 204 degësh. Për një madhësi normale çmimet variojnë nga 3.500 lekë deri në 5.000 lekë.
Ndërsa shembulli i pemës më të shtrenjtë që kemi marrë prej 25.000 lekësh, është 320cm e gjatë dhe lidhet me trendin e fundit, ku degët kanë ngjyrën e dëborës të bardhë.
Por nëse keni një standard më të lartë dhe kërkoni më shumë cilësi, në dyqanet që ndodhen në kryeqytet gjeni bredha që variojnë edhe nga 300 – 500 euro.
Për ata që zgjedhin bredhin origjinal duhet të dini që ta mbani dhomën në temperaturën e ambientit, pasi nxehtësia e shumtë dhe e shpeshtë e dëmton atë para kohe. Nëse blini një të tillë mund t’ju kërkojnë përafërsisht 10.000 lekë ose më shumë.
Çmimet e pemëve të Krishtlindjeve në tregje
Deri në 1 m madhësi 2500 lekë
1 m e 20 cm 3000 lekë
1.5 metër 4000 mijë lekë
2 metër 6.000 lekë
Mbi 2 metër, nga 10.000-20.000 lekë
Për pemët e bardha
Deri në 1 metër 3000 lekë
1.5 metër 5000 lekë
Mbi 1.5 metër 6000-10.000 lekë
