Rrjeti gjigant i supermarketeve, Lidl, po planifikon të hyjë në Shqipëri. Lajmi është bërë publik nga Agjencia Shqiptare e Zhvillimit të Investimeve.
“Një hap i rëndësishëm për ekonominë shqiptare, pritet të marrë jetë së shpejti. Bëhet fjalë për brandin ndërkombëtar Lidl, rrjetin më të madh të supermarketeve gjermane, të njohur në mbarë botën, i cili ka shprehur interes për Shqipërinë,” thuhet në njoftimin e AIDA-s.
I bazuar në Gjermani, Lidl është një nga rrjetet më të mëdha në botë të supermarketeve duke numëruar 12 mijë e 200 dyqane në të gjitha vendet e Bashkimit Europian, por edhe në SHBA, Zvicër dhe Angli. Aktualisht Lidl numëron mbi 376 mijë të punësuar në të gjithë botën dhe vitin e kaluar realizoi një xhiro prej 125.5 miliardë dollarësh, një shifër kjo 6 herë më e lartë se Produkti i Brendshëm i Shqipërisë.
“Agjencia Shqiptare e Zhvillimit të Investimeve (AIDA), në bashkëpunim me Autoritetin Portual Durrës (APD), po asiston prej shumë kohësh, kompaninë gjigande të shitjes me pakicë, Lidl, në zgjerimin e aktivitetit të saj në Shqipëri,” thuhet në njoftimin e AIDA-s.Futja e një gjigandi ndërkombëtar kaq të madh në Shqipëri pritet të sjellë ndryshime rrënjësore në strukturën e tregut vendas të marketeve, i cili zotërohet kryesisht nga operatorët lokalë.
“Ky investim i rëndësishëm nga Lidl do të sjellë ndryshime të mëdha në ekonominë lokale duke krijuar vende të reja pune dhe duke ofruar mundësi për prodhuesit dhe furnizuesit shqiptarë. Kompania ka identifikuar Shqipërinë si një treg me potencial të madh, duke e vlerësuar për miratimin e lartë të konsumatorëve. ndaj produkteve të cilësisë së lartë dhe çmimeve konkurruese që ofron,” përfundon njoftimi i AIDA-s.
Por, përse është vonuar deri më sot ky investim?
Ky investim i rëndësishëm nga një nga rrjetet më të mëdha në botë të supermarketeve “Lidl” do të sjellë ndryshime të mëdha në ekonominë lokale, por do të trondisë edhe bizneset e oligarkëve. Kjo për shkak se deri më sot në tregun shqiptar (i cili është pushtuar nga oligarkët), marrin furnizime nga jashtë vendit me një kosto të ulët e i sjellin në vendin tonë me 5-fishin e çmimit. Por si të mos mjaftonte vetëm kaq, shumë biznese të oligarkëve shkelin ligjin duke u bërë disa raste ku konsumatorët ankohen për cilësinë e mallrave që blejnë.
Jo pak herë është konstatuar tek këto biznese që shkelin ligjin duke ndryshuar kështu etiketat e datave të skadimit e duke vendosur të reja. Kjo ka ardhur si pasojë e mos kontrollimit të cilësisë së ushqimeve nga Autoriteti Kombëtar i Ushqimit i cili është përgjegjës për mbikëqyrjen e sigurisë ushqimore në Shqipëri.
Por, mesa duket ky institucion ka vendosur të qëndrojë i verbër ndaj ankesave të qytetarëve e duke sjellë kështu një treg të pushtuar me produkte të cilësisë së ulët e duke minimizuar opsionet e qytetarëve për të zgjedhur produktet e tyre.
Rasti më flagrant ishte së fundmi ku sipas portalit “RASFF” i Bashkimit Evropian, është shitur mish pule i infektuar me salmonelë në rrjetin e dyqaneve “KFC” në Shqipëri. Pyetja që ngrihet është se si është e mundur që ka kaluar doganën shqiptare pa u vënë re nga asnjë kontroll ose institucion zyrtar?
Nga ana tjetër, vonesa e kompanisë LIDL ka ardhur si pasojë e oligarkëve që po tentojnë me të gjitha mënyrat të mos lejojnë futjen e kompanisë gjermane në tregun shqiptar, sepse kjo do të sjellë një ulje drastike të fitimeve të tyre e një tronditje tek bizneset personale duke përfshirë këtu: cilësinë e produkteve, çmimin e tyre dhe kontrollet nga institucionet.
Ndërkohë mbetet për t’u parë deri kur do të mund ta “ndalojnë” futjen e kësaj kompanie në tregun shqiptar.
