Skiatorja shqiptare Lara Colturi ka arritur një tjetër rezultat të shkëlqyer në Kupën e Botës, duke u ngjitur për herë të tretë këtë sezon në podium. Ajo u rendit e treta në garën e slalomit të zhvilluar të dielën në Kolorado të Shteteve të Bashkuara të Amerikës, duke vazhduar serinë e sukseseve që e kanë kthyer në një nga emrat më premtues të disiplinës.
Në etapën e radhës të mbajtur në Copper Mountain, Lara u pozicionua menjëherë pas dy emrave të mëdhenj të skive botërore: amerikaneja Mikaela Shiffrin dhe gjermania Lena Duerr. Përballja ishte e fortë, ndërsa 19-vjeçarja shqiptare tregoi stabilitet dhe performancë të lartë në një garë të vështirë teknikisht.
Pas përfundimit të slalomit, Colturi tregoi se gara kishte qenë një provë e madhe fizike dhe psikologjike:
“Ishte një ditë e vështirë. Ishte një luftë sportive. Të them të drejtën, nuk e prisja të shkoja në podium, por jam e kënaqur dhe dua të vijoj në këtë drejtim në garat e ardhshme”, u shpreh ajo.
Sezoni aktual po rezulton edhe më i suksesshëm se ai i kaluar për skiataren shqiptare. Ndërsa një vit më parë u ngjit tre herë në podium, këtë sezon Lara e ka arritur këtë numër që brenda një muaji—dhe të gjitha në disiplinën e slalomit.
Aktualisht, Colturi renditet e dyta në klasifikimin e përgjithshëm me 278 pikë pas pesë garave të zhvilluara, duke konfirmuar se po kalon në një nivel të ri konkurrueshmërie dhe është e gatshme të luftojë për kreun e Kupës së Botës.
