Ish-ministri i Mbrojtjes Luan Hajdaraga është ndarë nga jeta në moshën 69-vjeçaren.
Mëngjesin e 23-marsit ai pësoi një hemorragji masive në tru, teksa kthehej nga Struga ku kishte shkuar për të dhënë mësim në universitetin e këtij qyteti.
Falë ndihmës së parë që iu dha në ato momente ish-deputeti shqiptar arriti të shpëtonte dhe me shpejtësi u transportua drejt qytetit të Përrenjasit ku e priste helikopteri që e transportoi drejt kryeqytetit.
Më pas, duke parë gjendjen e tij të rënduar shëndetësore ai u dërgua drejt Turqisë. Madje për t’i ardhur në ndihmë qeveria akordoi për ish-ministrin Hajdaragaj edhe një fond prej 1.9 milionë lekë për mbulimin e shpenzimeve mjekësore.
Vendimi
Në mbështetje të nenit 100 të Kushtetutës dhe të ligjit nr. 109/2017, “Për buxhetin e vitit 2018”, me propozimin e ministrit të Shëndetësisë dhe Mbrojtjes Sociale, Këshilli i Ministrave vendosi:
1-Mbulimin e shpenzimeve të transportit mjekësor të z. Luan Hajdaraga, në shumën 1 900 000 (një milion e nëntëqind mijë) lekë.
2-Kjo shumë të përballohet nga Fondi i Sigurimit të Detyrueshëm të Kujdesit Shëndetësor.
3-Pagesa të bëhet me paraqitjen e faturave përkatëse të transportit mjekësor ajror.
4-Ngarkohen Ministria e Shëndetësisë dhe Mbrojtjes Sociale dhe Fondi i Sigurimit të Detyrueshëm të Kujdesit Shëndetësor për zbatimin e këtij vendimi.
Ky vendim hyn në fuqi menjëherë.
Mirëpo pavarësisht kurimit të specializuar me sa duket ish-nënkryetari i Partisë Socialiste, Luan Hajdaraga nuk arriti të mbijetonte.
Burimi: Panorama
