Artisti i madh i skenës shqiptare Gaqo Çako është ndarë sot nga jeta. Ishte Teatri i Operas dhe Baletit, që dha lajmin e hidhur për vdekjen e 83-vjeçarit, përmes një njoftimi në Facebook.
“Lamtumirë simboli historik i operas dhe muzikës shqiptare, “Nderi i Kombit” – Gaqo Cako. Me hidhërim të thellë bëjmë me dije se pak minuta me parë eshte ndarë nga jeta në moshen 83 vjecare tenori virtuoz, simboli historik i muzikes operistike shqiptare, “Nderi i Kombit” – Gaqo Cako. Mjeshtri i madh u shua në shtepine e tij në Tiranë. Ngushëllime familjes, miqve dhe kolegeve të Gaqo Cakos – “Nderit te Kombit”. Për homazhet dhe ceremoninë mortore, TKOBAP do t’ju bëjë me dije në vijim”, shkruhet në njoftim.
Mjeshtri i Madh, tenori Gaqo Çako la pas shumë kujtime dhe këngë të dashura për publikun shqiptar. Ai ishte babai i kantautorit të njohur Pirro Çako.
https://www.youtube.com/watch?v=RpRwNKxlCu4
Jeta dhe vepra
Gaqo Çako lindi më 24 janar 1935. Tenori legjendar, që mban titullin Artist i Popullit, është i rreshtuar në emrat e mëdhenj të Panteonit të muzikës shqiptare si Ramiz Kovaçi, Mentor Xhemali, etj.
Midis viteve 1957 dhe 1961 ai studioi në konservatorin “Çajkovski” të Moskës nën drejtimin e pedagoges Anna Soloviova. Pas kthimit në Shqipëri më 1961 ai u emërua tenor i përhershëm i Teatrit të Operës dhe Baletit të Tiranës, ku këndoi shumë nga rolet e para të repertorit operistik, duke u bërë kështu tenori kryesor për tri dekada me radhë.
Përvoja dhe karriera e tij mjaft e pasur në operat “Traviata”, “Bohema”, “Rigoleto”, “Norma”, etj, si dhe operat shqiptare “Mrika” e Prenk Jakovës, “Lulja e kujtimit” e Kristo Konos, “Pranvera” e Tish Daisë, “Heroina” e Vangjo Novës, “Skënderbeu” i Prenk Jakovës e “Skënderbeu” i Abdulla Grimcit, “Komisari” i Nikolla Zoraqit, “Zgjimi” i Tonin Harapit, “Toka e jonë” e Pjetër Gacit, etj, i dhanë atij një karrierë të shkëlqyer. Mjaft i njohur edhe në skenat italiane, ku ai ka mbaruar konservatorin e Santa Cecillias.
Zëri i tij u kthye në objekt kënaqësie kudo që ai u dëgjua e u shfaq, në opera, në televizion, në radio, në salla të mëdha a të vogla koncertesh. Edhe pse vlerën më të madhe ai e pati në interpretimet e roleve operistike, ai u popullarizua nëpërmjet këngës, veçanërisht atyre të Festivaleve të Radios.
Burimi: Panorama
