Është arrestuar sot ish-deputeti i Partisë Socialiste, Arben Ndoka.
Ndalimi i tij u bë nga forcat RENEA pasditen e sotme së bashku me 2 persona të tjerë, njëri prej të cilëve është Xhevahir Ndoka, vëllai i ish-deputetit.
“Ora News” shkruan se Arben Ndoka prej muajsh ishte një person në hetim për tjetërsim pronash në Lezhë.
“Policia e Shtetit ka ekzekutuar urdhrin e arrestit për shtetasin Arben Ndoka, 46 vjeç, nga Lezha, për të cilin Gjykata e Krimeve të Rënda ka caktuar masën “Arrest në burg”. Ai dyshohet për veprat penale “Falsifikimi i dokumenteve”, Falsifikimi i vulave, stampave ose i formularëve”, “Shpërdorimi i tokës”, në kuadër të një grupi kriminal, të përfshirë në tjetërsim tokash”, njofton policia.
Policia thotë se hetimi disa mujor ka mbledhur prova dhe se ky grup kriminal dyshohet si i implikuar në abuzimet me troje shtetërore në zonën e Lezhës dhe Kurbinit, përmes falsifikimit të dokumenteve e vulave.
Në shtator të vitit 2015, Arben Ndoka dorëzoi mandatin e deputetit, pasi u prek nga ligji i dekriminalizimit, duke qenë se kishte një dënim në Itali.
Ky është ish-deputeti i dytë socialist që përfundon në pranga brenda pak orësh.
Më herët u njoftua arrestimi i ish-drejtorit të Burgjeve, Arben Çuko.
