Të gjithë maturantët që kanë vendosur të studiojnë në Shqipëri, duhet të kryejnë aplikimet në universitet nga datat 30 korrik deri më 4 gusht. Në aplikimin që do të kryhet online, duhet të renditen 10 preferencat e degëve që do të studioni. Megjithëse në këtë fazë të rënësishme janë kriteret e pranimit dhe jo renditja e degëve.
“Ata duhet të bëjnë një përllogaritje që është 50% për notën mesatare të 3 viteve të shkollës së mesme, plus mesataren e notave të provimeve të maturës shtetërore. Nëse kanë një mesatare mbi notën 6, mund të aplikojnë në të gjitha programet, por jo tek mjekësia, që është mbi 8 për infermierinë, 8.5 për mjekësinë dhe mbi 7 për mësuesinë. Nëse e kanë mesataren mbi këtë notë, vetë sistemi nuk ua nxjerr, ata do të duan të të kapin ato degë por sistemi nuk ua nxjerr fare, pra sistemi nuk hapet fare”, deklaroi Rezana Vrapi, Drejtore e Qendrës së Shërbimeve për “Top Channel”.
Sakaq, formulari A2 pritet të plotësohet nga 26 mijë maturantë, të cilët do të kenë edhe një shans të dytë.
“Në raundin e dytë që do të jetë diku në muajin shtator janë ata që nuk kanë fituar në raudin e parë, por me degët që kanë mbetur tashmë”, deklaroi Vrapi.
Për maturantët që duan të guxojnë sërish për të arritur degën e preferuar ekziston e drejta e riaplikimit.
“Në fund të fazës së parë, çdo maturant ka të drejtë çregjistrimi. Ata do të kenë 48 orë kohë për ta bërë këtë”, deklaroi drejtoresha Vrapi.
Burimi: Top Channel
