Rruga Qafa e Thores-Theth tashmë është e hapur për të gjithë turistët shqiptarë e të huaj.
ARRSH (Autoriteti rrugor shqiptar) paralajmëron se drejtuesit e mjeteve duhet të bëjnë kujdes gjatë udhëtimit duke respektuar sinjalistikën dhe duke reduktuar shpejtësinë. Pa harruar gjithashtu edhe të pajisen me zinxhirë e goma dimërore.
Njoftimi i ARRSH:
‘Hapet për qarkullimin e mjeteve rruga Qafa e Thores-Theth! Për herë të parë në këtë periudhë u hap rruga nga Qafa e Thores deri në Theth! Një aks me terren të vështirë malor, me lartësi mbi 1800 metra mbi nivelin e detit, dendësia e borës arrin deri në 4 metra temperaturat e ulëta dhe rënia e herëpashershëm e ortekëve e kanë bërë edhe më të vështirë punën e mjeteve borëpastruesve dhe të punëtorëve.
Tashmë ia dolëm dhe mund ta vizitoni fshatin turistik, Thethin pa probleme me qarkullimin. Drejtuesit e mjeteve të bëjnë kujdes gjatë udhëtimit, të respektojnë sinjalistikën të reduktojnë shpejtësinë, të pajisen me zinxhirë dhe goma dimërore.’- njofton ARRSH.
Nga Boga deri në Theth janë rreth 30 kilometra rrugë automobilistike që përfshijnë një ngjitje deri në 1700 metra mbi det dhe zbritje deri në 900 metra.
Thethi, pjesë e qarkut Shkodër është një nga fshatrat turistik më të vizituar vitet e fundit në Shqipëri.
