Mbyllja e një viti na bën të reflektojmë mbi arritjet dhe dështimet tona dhe mbi të gjitha na ndihmon të vendosim edhe objektiva të qarta për vitin e ri që nis. Të shumtë janë ata që një ndër objektivat kryesore të vitit të ri kanë edhe lëninen e duhanit. Tashmë i njoftojmë zyrtarisht se është shtuar edhe një arsye tjetër se përse nuk duhet ta konsumojnë më duhanin.
Sipas ndryshimeve të paketës fiskale për vitin 2018, tashmë një paketë cigare do të kushtojë 7 lekë më shumë se më parë. Ndryshimi hyri në fuqi që në 1 janar 2018.
Gjithashtu ndryshime do të ketë edhe në fushën e teknologjisë dhe informacionit, pasi nga 1 janari, qeveria ul tatimin mbi të ardhurat për të gjitha bizneset e kësaj fushe, nga 15% në 5%. Kjo ulje do të aplikohet për ato biznese që prodhojnë software me destinacion jashtë Shqipërisë, me qëllim që të nxitet ky sektor që prodhon për eksport.
Nga janari, rreth 9600 biznese me xhiro nga 2 milionë deri në 5 milionë do të përfshihen në zinxhirin e TVSH-së. Sakaq lehtësira do të ketë për turizmin, Me qëllim nxitjen e këtij sektori, resortet dhe hotelet me 4 dhe 5 yje, për vlerë investimi mbi 8 milionë euro nuk do të paguajnë tatim-fitim, për 10 vitet e para përjashtohen dhe nga pagesa e taksës së infrastrukturës.
