Një ditë më parë, lajmi se moderatoja e njohur Viola Spiro braktisi “RTSH-në” për televizionin “Klan Plus” bëri bujë të madhe mediatike.
Nga një spot promovues i publikuar nga “TV Klan”, u zbulua se bukuroshja do prezantojë një emision të ri të quajtur “Sport Plus.”
Ndërkohë, pati aludime se bashkë me të në pjesën e moderimit do ishte edhe Turjan Hysko, pasi pak ditë më parë ai publikoi disa foto ku shfaqej në studion e emisionit në fjalë që pritet të transmetohet së shpejti.
Së fundmi, ka pasur një reagim nga vetë Viola e cila ka rrëfyer për “revistawho.com” detaje për emisionin e ri si dhe për largimin e papritur nga RTSH.
“Stafi i ‘RTSH’ është ndër më të mirët me të cilët unë kam bashkëpunuar. Pas 2 sezonesh të ‘Europa League’ dhe një botërori shumë të suksesshëm në ‘RTSH’ vendosa të pranoj ofertën e ‘Klan Plus’ që do pasurohet me programacion dhe unë do kem hapësirën time tek sporti. Do jem çdo ditë ‘live’ mbas edicionit qendror të lajmeve, me studio ‘Sport Plus’ ku do përcjell çdo lajm dhe ngjarje sportive edhe me të ftuar herë pas here. Është shumë i ngjashëm me transmetimet e ‘Sport Mediaset’. Kam mbi 5 vjet në fushën e sportit dhe e kam me shumë dëshirë të vazhdoj të qëndroj vetëm tek ky format”, ka deklaruar moderatorja.
