Kryeministri Edi Rama ka zhvilluar një bashkëbisedimin ‘live’ me portalin studentor në Instagram, ku edhe ka folur rreth mbylljes së universiteteve, largimit të të rinjve nga Shqipëri dhe masave shtrënguese.
I pyetur se si do na gjejë Viti i Ri, Rama tha se në shumë aspekte mund të thuhet që më e keqja ka kaluar ndërkohë që në aspektin e pandemisë jemi duke kaluar më të keqen sepse ky dimër do jetë shumë i vështirë nga pikëpamja shëndetësore.
Megjithatë shtoi se do të dalim të fortë nga kjo sfidë. Ai tha se për momentin nuk është folur për masa shtesë shtrënguese duke qenë se sipas tij situata duket në ekuilibër, por nuk e përjashtoi një vendimmarrje të tillë në ditët në vijim.
“Në shumë aspekte mund të thuhet që më e keqja ka kaluar ndërkohë që në aspektin e pandemisë mund të themi se jemi duke kaluar më të keqen sepse ky dimër do të jetë shumë i vështirë nga pikëpamja shëndetësore. Do ta kalojmë dhe do të dalim më fortë. Masat shtrënguese nuk i vë unë por eskpertët. Masa më e rëndësishme mbetet se çfarë bëjmë secili si individ. Deri tani ma ha mendja që nëse shohim atë që është problemi kryesor i kësaj sfide, aftësinë për të përballuar fluksin në spital, jemi në ekuilibër. Nëse shohim fatalitetet jemi në ekuilibër. Për momentin nuk kemi folur për masat shtrënguese por kjo nuk i përjashton ato sepse vendoset hap pas hapi”, u shpreh Rama.
Lidhur me vaksinën, Rama deklaroi sot se nuk ka një kontratë për sigurimin e vaksinës anti-COVID, por se Shqipëria është angazhuar me të gjitha kontaktet për të mos mbetur pas. Ai tha se Shqipëria është e përfshirë në ato sisteme të ngritura për ta blerë vaksinën dhe se ka dedikuar një fond.
“Për vaksinën, kjo është një risi pozitive sepse sjell faktikisht armën për të mbrojtur shëndetin nga ky virus duke imunizuar njerëzit. Këtu jemi shumë të fokusuar. Është një situatë turravrapi për të garantuar vaksinën, ndërkohë që ka dhe një paqartësi të madhe për si qysh, tek. ne jemi të angazhuar me kontakte në të gjitha nivelet për të mos mbetur mbrapa. nuk ka një kontratë të nënshkruar, jemi përfshirë në ato sisteme që janë ngritur në këmbë për ta blerë vaksinën dhe kemi dedikuar dhe ne një fond por në momentin që flasim nuk ka asnjë kontratë apo një afat të fiksuar. Përpjekja jonë është një orë e më parë bashkë me të tjerët të kemi mundësinë për të vaksinuar njerëzit”, tha Rama.
