Pas propozimit të Taulant Ballës, me 97 vota PRO, Kuvendi i Shqipërisë vendosi për heqjen e testeve të gjuhës shqipe dhe historisë, për qytetarët e vendeve ku gjuha shqipe është zyrtare, si Kosova apo Maqedonia e Veriut.
Këto ndryshime krijojnë mundësinë për përthithjen e talenteve të reja, të cilët nuk kanë mbushur moshën 18 vjeç, kur Republika e Shqipërisë ka interes kombëtar apo interes në fushën e arsimit, shkencës, artit, kulturës, ekonomisë dhe sportit.
“Këtë vendimmarrje do e quaja historike, për të çuar përpara një përgjegjësi që ka vendi amë për ata që aplikojnë për pasaportat me natyralizim”- tha Taulant Balla.
Ky vendim i ri shmang gjithashtu tarifën që qytetarët duhet të paguanin për të marrë nënshtetësinë shqiptare.
