Këngëtarja e njohur, Jonida Maliqi, do të përfaqësojë Shqipërinë në skenën e madhe të Eurovizionit më 16 maj me këngën “Ktheju Tokës”.
Thuhej se ajo do të ishte e vetme në skenën e festivalit europian të këngës. Por ashtu siç e theksoi dhe Jonida Maliqi pak kohë më parë ajo do të shoqërohet nga “back” vokalet.
Dhe tashmë zbulohet se kush do do të jenë tre zërat shoqërues të këngëtares shqiptare. Tre artistët e rinj të përzgjedhur për të mbështetur në skenë Jonida Maliqin janë: Wendi Mancaku, Artemisa Mithi dhe Tiri Gjoci.
Wendi, e cila është vajza e kantautorit të njohur Edmond Mancaku, fitoi më shumë famë vitin e kaluar me pjesëmarrjen te “Kënga Magjike”. Kënga e saj “Ëndrra ime” u prit mjaft mirë nga juria, pasi u vlerësua me çmimin “Best New Artist”, por edhe nga publiku.
Gjithashtu dhe Artemisa Mithi është një emër i njohur i skenës shqiptare. Në vitin 2014 ajo ishte finaliste në programin “Gjeniu i Vogël 6”, ndërsa dy vite më pas mori pjesë në “The Voice of Albania 6”. Në dhjetor të 2018-s, Artemisa Mithi mori pjesë në Festivalin e 57-të në RTSH me këngën “Dua ta besoj”, një bashkëpunim me Febi Shkurtin.
Tahir Gjoci, i njohur me emrin e skenës Tiri, i mori zemrën publikut kur doli fitues i “The Voice Of Albania 5” në 2016-n. Në po të njëjtin vit ai mori pjesë në festivalin “Kënga Magjike” me këngën “Pa ty nuk mund”, si dhe në Festivalin e 55-të të RTSH-së me këngën “Më zgjo”. Pjesëmarrja e tij e fundit në një festival ishte në 2017-n me këngën “Orë e ndalur”, te ai i RTSH-së.
Tashmë e dimë që Jonida Maliqi ka mbështetjen e duhur!
Burimi: Iconstyle.al
