Në deklaratën për shtyp të dhënë sot nga ministrja e Arsimit, Besa Shahini u fol edhe për nxjerrjen e tezave të provimeve të maturës 2020.
Autori ende nuk dihet, por ministrja tha se kjo do të zbulohet shumë shpejt pasi çdo test kishte kodin e vet, që mund t’i identifikojë. Me ta zbuluar autorin, do të merren masa ndaj tij.
“Kemi vendosur kode në secilin test, këto që kanë dalë në rrjetet sociale apo tv mund ti identifikojmë kush i ka nxjerrë dhe do të marrim masa ndaj tyre dhe do të vijojë. Do të testojmë dhe forma të tjera si do të zbatohet vitin tjetër” u shpreh ministrja Shahini ne nje konference per median.
Ndërkohë, nxënësit që qenë në provim me telefon janë përjashtuar nga diplomimi për një vit.
Ministrja tha se vitin e ardhshëm do të adresohet dhe nota fiktive.
“Me maturën 2021 do të shohim nxënësit që kanë marrë 4 nota më pak se mesatarja e shkollës së mesme të marrin masa ndaj mësuesve të tyre. Në fund të vitit tjetër shkollor do shohim peshën që ka nota e viteve në krahasim me notën e provimit”.
Ministrja e Arsimit, Besa Shahini ka sqaruar sot se nga shtatori, mësimi do të realizohet në dy formate, fizikisht në klasa edhe online. Sipas Shahinit, po përgatitet një platformë e re online që do lehtësojë krijimin e klasave virtuale.
“Kanali RTSH shkolla do të vazhdojë të punojë edhe gjatë verës, që në shtator të jetë tërësisht gati”, tha Shahini.
/Ora News
