Kryeministri Rama nuk zbuloi më tepër detaje për faktin si po punohet për të rregulluar pjesën e faturave të energjisë elektrike në bazë të parimit: “Të pasurit do të paguajnë më shumë së të varfërit”.
Më shumë lidhur me këtë ide të qeverisë ka shpjeguar ministrja Balluku, që tha se nuk do të bëhet klasifikim i familjeve të pasura dhe të varfra.
Ajo tha se rreth 700 kilovat në orë është mesatarisht sasia e energjisë që konsumon një familje. Pra ato familje që e kapërcejnë këtë fashë do të konsiderohen të “pasura” në pagimin energjisë e elektrike. Por gjithashtu Balluku sqaroi se 700 kilovat orë është thjesht në kuadrin e propozimit dhe se nuk ka ende një vendim mbi këtë.
“Kryeministri nuk e ka thënë të pasur dhe të varfër, nuk mund t’i ndajmë kështu. Nuk kemi ndonjë synim që t’i klasifikojmë kështu. Kryeministri i referohet personave që konsumojnë më shumë energji. Ne po bëjmë një studim se sa kilovat/orë i duhet familjeve normale për të konsumuar. Për të pasur elektroshtëpiake, ngrohje mesatare dhe për të pasur një familje mesatare. Përsa i përket familjarëve, duke pasur një analizë të mirëfilltë, cila konsiderohet një sasi që mund të sigurojë energjinë. Sot po bëjmë diferencimin e një fashe. Rreth 700 kilovat orë është fasha. Nuk është marrë një vendim. Rreth 700 kilovat orë është mesatarisht sasia e energjisë që konsumon një familje. Ata që harxhojnë më shumë, do paguajnë më shumë. Ne na është dashur t’i futemi kësaj analize për të klasifikuar energjinë e nevojshme. Kush do harxhojë më shumë, do e paguajë”, tha ministrja Balluku.
