Më 30 dhjetor, Li Wenliang hodhi një “bombë” në grupin e mesazheve të shokëve të shkollës së tij mjekësore, në aplikacionin popullor kinez WeChat.
Shtatë pacientë nga një treg lokal me prodhime deti ishin diagnostikuar me një sëmundje të ngjashme me SARS dhe u vendosën në karantinë në spitalin e tij.
Li shpjegoi se, sipas një testi që ai kishte parë, sëmundja ishte një Koronavirus – një familje e madhe e viruseve që përfshin sindromën e rëndë akute të frymëmarrjes (SARS).
Kujtimet e SARS janë shenjuar thellë në memorien e njerëzve në Kinë, ku një epidemi në vitin 2003 vrau qindra persona.
“Unë vetëm doja t’i kujtoja shokët e mi të universitetit që të ishin të kujdesshëm,” tha ai.
Li, mjeku 34-vjeçar që punon në Wuhan, qyteti qendror kinez i epiqendrës së shpërthimit të Koronavirusit vdekjeprurës, u tha miqve të tij që të paralajmërojnë të dashurit e tyre privatisht.
Por brenda disa orësh, pamjet nga mesazhet e tij u bënë virale – pa u fshirë emri i tij.
“Kur i pashë duke qarkulluar në internet, kuptova që ishte jashtë kontrollit tim dhe unë ndoshta do të ndëshkohesha,” tha Li.
Dhe kishte të drejtë.
Pak pasi ai postoi mesazhin, Li u akuzua për thashetheme nga policia në Wuhan. Ai ishte një nga disa mjekët e vënë në shënjestër nga policia për përpjekjen e tij për të zbuluar virusin vdekjeprurës në javët e para të shpërthimit.
Që atëherë virusi ka marrë të paktën 425 jetë dhe ka infektuar më shumë se 20,000 njerëz globalisht – përfshirë mjekun Li.
/CNN
