Ukraina është fituesja e edicionit të 61-të të “Eurovision”-it. Këngëtarja Jamala nga Krimea, por përfaqësuese e Ukrainës, u shpall fituese në Festivalin Europian të Këngës, në natën finale të zhvilluar në Stokholm të Suedisë.
Kënga e saj “1944” siguroi 534 pikë, teksa i dedikohej deportimit të tatarëve krimeanë nën regjimin e Stalinit. Ukraina u ndoq më pas nga përfaqësuesit e Australisë me 511 pikë dhe Rusisë me 491 pikë.
Në skenën e “Globe Arena” në Stokholm ka pasur një duel të vërtetë deri në votën e fundit mes Ukrainës dhe Rusisë, e cila ishte gjithashtu një pretendente e fortë.
Jamala është e para shtetase e etnisë tatare nga Krimea, që performonte në një festival të tillë, ndaj dhe shkaktoi pakënaqësira përpara shfaqjes finale për shkak se kënga e saj cilësohej si “politike”. Kjo sepse kënga i referohej vitit kur Stalini deportoi thuajse të gjithë grupin etnik nga rajoni i tyre ku kishin lindur, Krimea, në atë kohë pjesë e Bashkimit Sovjetik, ndërsa më pas u bë pjesë e Ukrainës, deri para pak vitesh kur Putin e rimori sërish nën pushtetin e Kremlinit.
Këngëtarja falënderoi Europën për votat që i dhanë këngës së saj, teksa shtoi se, “në fakt ajo kërkon paqe dhe dashuri për të gjithë”. “Është fantastike. E dija se po të flisje për të vërtetën, ajo i prek thellë ndjenjat e njerëzve”, tha Jamala.
Shqipëria nuk mundi të hynte në natën finale, pasi nuk siguroi votat e mjaftueshme për këngën “Përralla” të interpretuar nga Eneda Tarifa.
Në skenën e eventit për herë të parë në historinë e “Eurovision”-it u ngjit një këngëtar me famë ndërkombëtare, Justin Timberlake.
Burimi: Eurovision
