Të dielën vendosim për qeverinë e katër vite dhe të gjithë japim mendimet se kush do t’i fitojë zgjedhjet e 25 qershorit. Tani fjalinë e fundit e kanë marrë fallxhoret. “Fiks Fare” i është drejtuar disa fallxhoreve për t’i pyetur se cila forcë politike do fitojë në 25 qershor dhe përgjigjet ishin…të ndryshme.
Një fallxhore në Lushnje thotë se zgjedhjet do të zhvillohen me sukses. Sipas saj në Bashkinë e Tiranës do të fitojë Basha, pasi në “zyrën” e saj kanë shkuar disa njerëz të PD-së nga Tirana me furgona të blinduar. Ajo thotë se ka kontakte të fuqishme me njerëz në pushtet në Tiranë.
Ndërkohë, gazetarët e Fiksit shkuan edhe në një fallxhore në Tiranë, në zonën e Laprakës. Gazetarja i prezantohet si një vajzë, vëllai i së cilës është me Partinë Socialiste, por ndër të tjera flet edhe për zgjedhjet. Sipas kësaj fallxhoreje Partia Demokratike ka mbrojtje nga një i madh i lartë, që është Donald Trump , presidenti i SHBA-ve (kjo shpjegon foton e famshme), por ka kundër Ilir Metën, që me shumë gjasa mund të bëhet kryeministër.
Fallxhorja thotë se ‘Meta e ka “krimbin” brenda, pasi ka Monikën nga pas’. Ajo i jep gazetares dy nuska, që i lidh me pe dhe i ” këndon”. Te njëra lidh Sali Berishën dhe të tjetra lidh Lulzim Bashën. I thotë njërën do ta çosh te PD-ja, ndërsa tjetrën ta mbante i vëllai i gazetares me vete. Sipas saj, në këtë mënyrë fituese në zgjedhje do të jetë PS-ja.
Burimi: Top Channel
