Ende nuk ka një datë ekzakte për hapjen e transportit publik, por mendohet se në fund të muajit kjo gjë të jetë zgjidhur.
Kreu i shoqatës së transportit urban Rixhin Qosja tha në emisionin “Ditë e Re në RTV Ora, se bashkia e Tiranës në bashkëpunim me Ministrinë e Infrastrukturës po përcaktojnë protokollin e sigurisë dhe po diskutohet që të hapet në këto ditët e fundit të muajit maj.
“Konkret jo, Bashkia e Tiranës në bashkëpunim me Ministrinë e Infrastrukturës janë në kontakte për të gjetur këto modalitetet e fundit, për protokollin e sigurisë, për mënyrën e operimit, skemën financiare që do funksionojë ky shërbim sepse është shumë e rëndësishme dhe unë shpresoj të përfundojë sa më shpejt të jetë e mundur. Një datë fikse nuk di ta them për momentin, por diskutohet për ditët e fundit”.
Dhe ndërkohë që një urban që ishte 12 metra i gjatë kishte kapacitetin e 100 pasagjerëve, në këto kushte pandemie në të do të qarkullojnë jo më shumë se 25 ose 30 persona.
“Ne jemi munduar të adaptojmë ato protokolle sigurie që ka bërë edhe Evropa dhe Kosova. Në një mjet transporti publik nuk do qarkullojnë dot më shumë se 25 ose 30 persona në të njëjtën kohë. Në një mjet urban që është 12 metra i gjatë qëndrojnë ulur dhe në këmbë 100 pasagjerë, ndërsa tani mendohet të reduktohet në 25-30”.
Por a do të sjellë kjo një rritje të çmimit? Qosja u shpreh se janë kërkuar disa mënyra të tjera sesi ta bëjnë sektorin e transportit të mbijetojë në kushtet e krizës, pa rritur çmimin.
“Të vetmen gjë që nuk e kemi kërkuar është rritja e çmimit. Sepse edhe po të rritet çmimi nuk do mund ta kompensojë dot humbjen që ne do gjenerojmë nëse dalim në punë si normalisht. Sepse të transportosh 30% të kapacitetit do të thotë që është humbje çdo ditë. Kështu që ne kemi kërkuar disa mënyra të tjera për të bërë që ky shërbimi të mbijetojë”.
Qosja u shpreh se është kërkuar mbështetje financiare si nga Bashkia e Tiranës ashtu edhe nga qeveria:
“Nuk po flasim për fitime, por ne duhet të mbijetojmë në mënyrë që shërbimin ta ofrojmë dhe për më tepër edhe për stafin tonë që janë 1500 veta në Tiranë që janë pa punë”.
/Ora News
