Ministria per Evropën dhe Punët e Jashtme konfirmon vijmësinë e punës në pikën kufitare Kakavijë dhe pikën kufitare Kapshticë, deri në orën 22:00 të mbrëmjes së sotme.
Lajmi pozitiv që është pritur mirë nga qytetarët, erdhi pas pezullimit të punës ditën e sotme kur edhe u arrit kuota e kalimit të 750 personave në Kakavijë dhe 300 personave në Kapshticë.
Ndërkohë, kushtet që çdo qytetar duhet të plotësoje për të kaluar pikën doganore dhe për t’u futur në Greqi nga e hëna janë:
– Testin negativ të COVID-19 (RT-PCR), i cili duhet të jetë kryer deri 72 orë para mbërritjes në pikën e kalimit kufitar, nga laboratorët publike apo private të certifikuara në Shqipëri. Ky rregull nuk vlen për shoferët e kamionëve që transportojnë mallra dhe fëmijët nën 10 vjeç.
– Vërtetimin diagnozë të përkthyer në anglisht, në të cilin duhet të jenë të shënuara emri, mbiemri dhe numri i pasaportës/numri i kartës së identitetit të individit.
– Vërtetimin e plotësimit të formularit të posaçëm PLF, me kodin QR (nga adresa elektronike https://travel.gov.gr).
– Testi i COVID-19 (RT-PCR) është i vlefshëm vetëm nga laboratoret e linçesuar nga Ministria e Shëndetësisë dhe Mbrojtjes Sociale, të cilat mund t’i gjeni në faqen zyrtare.
Ora 11:52/ Kuota për kalimin e 750 peronave në Kakavijë u plotësua! Çfarë do të ndodhë më pas?
Drejtori i Kufirit, Arben Joco, tha sot në një njoftim për shtypin se pas disa orësh punë, është arritur në limitin e numrit prej 750 personash që lejohen të kalojnë kufirin grek.
Pas plotësimit të kësaj kuote pritet një përgjigje nga pala greke se si do të vijojë puna.
“Shqiptarët që janë të interesuar për të udhëtuar drejt Greqisë që nga dita e nesërme në shtetin Grek do të kalojnë ata që janë testin dhe duke plotësuar formularin e udhëtimit. Nga pala greke është vendosur edhe një numër limit, 750 persona, të cilët duhet të përmbushin kriteret dhe këto kritere do të vijojnë deri në një njoftim të dytë”, u shpreh Joco.
E njëjta gjë po ndodh edhe në Kapshticë, ku kuota është 300 persona dhe aktualisht aty është pezulluar kalimi, duke pritur një njoftim të dytë.
“Deri tani po vazhdojnë të punojnë normalisht, presim njoftim nga pala greke si do të vijohet puna. Aktualisht jemi në limitet e numrit, por nuk kemi një njoftim për mbyllje, shpresojmë që të marrim një njoftim pozitiv. Ne kemi të drejtë t’i sqarojmë kërkesat e palës greke, pala greke thotë nga dita e nesërme nuk do të lejohet asnjë shqiptar rezident pa pasur testin COVID. Deri tani jemi në limitet, jemi rreth 700, deri tani. Puna vijon, se ka shtetas atje, kjo është praktika, ato që janë atje kalojnë, jo problem policor po ato shëndetësor, ne presim që të jemi si do të vendoset, do të vijojnë apo jo. Numri prej 750 dhe testi COVID, ka qenë për datën 17 gusht, ne nuk kemi lajm të konfirmuar, presim si do të ecë”, tha Joco në prononcimin për mediat.
Ndërkohë, Fax News njofton se pala greke ka mbyllur portat në Kakavijë pasi është përmbushur kuota për kalimin e 750 personave në territorin e tyre. Pritet për t’u parë nëse do ketë negocim mes palëve për riçeljen e pikës gjatë orëve në vijim.
/Iconstyle.al
