Të paktën 26 persona kanë humbur jetën në plazhet shqiptare që prej nisjes së sezonit turistik në muajin qershor, sipas të dhënave të Policisë së Shtetit.
Viktimat kanë qenë të moshave të ndryshme dhe deti nuk ka kursyer as fëmijët siç është rasti i 9-vjeçares në plazhin e Rrushkullit, e cila humbi jetën më 26 gusht.
Fatkeqësia u thellua më tej pasi u mbyt edhe i ati. Pasi pa që vajza po mbytej, babai u fut në det për ta shpëtuar, por nuk ja doli dhe humbi jetën mes dallgëve.
Në listën e viktimave janë edhe shumë të rinj, teksa viktima e parë për këtë sezon turistik ishte një i moshuar nga Kosova, i cili kishte ardhur në Shqipëri për të pushuar. 75-vjeçari ka ndërruar jetë mesditën e 1 korrikut në plazhin e Shëngjinit në Lezhë.
Në muajin qershor humbën jetën 2 pushues në det, ndërsa në korrik viktimat në det kanë qenë 10 persona, duke arritur në 12 gjatë muajin që lamë pas. Teksa në javët e para të shtatorit raportohet për të paktën 2 të mbytur.
3 zonat me numrin më të lartë të atyre që humbin jetën në det janë Durrësi, Velipoja dhe Shëngjini, ku ka edhe më shumë pushues.
Kujtojmë se shifrat kanë pësuar një rritje të ndjeshme krahasuar me një vit më parë, ku në muajt e verës humbën jetën 22 persona.
Fakti që gjendja është përkeqësuar, do të thotë se këtë vit kullat e rojeve bregdetare kanë ekzistuar vetëm në inventarin e Ministrisë së Turizmit, ndërsa rojet e plazheve kanë figuruar në listë-pagesat e digasterit vetëm sa për të marrë pagat.
Po ashtu, ministria e drejtuar nga Blendi Klosi, edhe pas premtimeve dhe propagandës së madhe, nuk ka bërë asgjë për të shtuar rojet bregdetare dhe për t’i bërë plazhet më të sigurta. Përkundrazi!
Të gjithë viktimat kanë qenë me pushime në bregdet, thotë policia, që mes shkaqeve kryesore të ngjarjeve rendit kontaktin me ujin e ftohtë, që mund të sjellë atak kardiak, kryesisht për moshat e mëdha.
Por një përpjekje e dëshpëruar e ministrisë së Turizmit, në bashkëpunim me atë të Shëndetësisë, ka synuar që viktimat që kanë humbur jetën në bregdet si pasojë e mosdhënies së ndihmës në kohën e duhur, t’i nxjerrin sikur kanë qenë me probleme shëndetësore, apo kanë pësuar arrest kardiak para se të futen në ujë.
Nga një vëzhgim që “Televizioni Klan” kishte bërë në bregdetin shqiptar rreth një muaj më parë, rezultoi se, kullat e vrojtimit ishin ngritur, por rojet bregdetare shpesh mungonin ose nuk qëndronin në vendin e duhur, pra nuk ishin vigjilentë. Kjo konfirmohet edhe nga shumë pushues.
Pavarësisht përpjekjeve tona për të kontaktuar me Ministrinë e Turizmit për të marrë shpjegimet e nevojshme, vlen të theksohet se, nuk kemi marrë asnjë informacion dhe transparencë të shifrave.
Si për të vërtetuar mjerimin në zonat bregdetare, disa ditë më parë në rrjetet sociale qarkulloi kjo foto, që tregon një tabelë që thotë shumë qartë se, rojet bregdetare nuk janë gjatë gjithë kohës në dispozicionin eqytetarëve.
Sipas saj, nëse doni të shkoni në plazh, duhet të dini, se bazuar nga tabela, nga mbytja shpëtoheni nga ora 10:00-13:00 dhe nga ora 16:00-18:00.
Masat për sigurinë e pushuesve që nuk janë zbatuar nga stacionet e plazhit, u kanë marrë jetën dhjetëra personave këtë sezon turistik dhe kjo problematikë mbi menaxhimin e plazheve shqiptare, duhet vëzhguar edhe nga Kontrolli i Lartë i Shtetit dhe çdo institucion përgjegjës.
