Menjëherë sapo kalon Qafë-Thanën dhe shkel në qytetin e Pogradecit, sytë të shkojnë te një fshat i vogël në cep të rrugës, i ndërtuar buzë liqenit. Teksa futesh dalëngadalë në fshat, mahnitesh nga magjia e shtëpive të vogla që janë ndërtuar kaq afër njëra-tjetrës dhe oborri i shtëpive është vetë liqeni i Pogradecit.
Rruga nuk është e përshtatshme për makinat, ndaj parkojeni diku dhe sodisni duke ecur, rrugët e ndërtuara me guriçka e kalldrëm. Pavarësisht se vitet kalojnë, banorët e fshatit kanë preferuar të mos ndryshojnë asgjë, por i qëndrojnë stoikë imazheve të liqenit të hershëm. Dhe Lini ofron diçka që vendet e tjera nuk e kanë: QETËSINË.
Ku ndodhet?
Lini është një gadishull i vogël në brigjet perëndimore të Liqenit të Ohrit, 22 km nga qyteti i Pogradecit. Sipas banorëve të fshatit, Lini shtrihej deri në mesin e liqenit, por me kalimin e viteve u mblodh aty ku ndodhet edhe sot. Ndërkohë që të tjerë banorë, rrëfejnë se Lini ka qënë i rrethuar nga të katërta anët me ujë, ndaj dhe quhet “Gadishulli i Linit”.
Çfarë mund të bësh në Lin?
Lini është një mrekulli më vete, pasi fsheh disa plazhe me ujëra të kristaltë, plot rërë dhe guraleca të vegjël. Nëse preferoni qetësinë, natyrën dhe imazhe piktoreske, Lini është zgjidhja e duhur pasi liqeni i ndërthurur me hijet e pemëve është gjithçka që kemi nevojë. Jo shumë persona, janë në dijeni të kësaj mrekullie ndaj është perfekte për të realizuar një ditë piknik me miqtë dhe familjen.
Çfarë duhet të marrim me vete?
Rrobat e banjës dhe kremrat mbrojtës ndaj diellit janë dy produktet që duhet të paketoni me vete. Por mos harroni të merrni edhe ushqime si dhe pije, pasi nuk ka dyqane pranë. Duke qënë se është një zonë shumë e qetë, mos e përjashtoni mundësinë për të fjetur në çadra kampingu (Gjithmonë nëse je një tip aventurier). Ndërsa telefonin, karikuesin apo aparatin fotografik, nuk po ua përmendim fare sepse këto i keni parasysh vete!
Ndaj bëhuni gati dhe nisuni drejt një fundjave magjike!
*Kujdes! Ndalohet riprodhimi i këtij materiali pa lejen e redaksisë së Iconstyle.al
