Çdo fundjavë të gjithë kemi dilemën se ku do të shkojmë. Një zgjedhje sa e lehtë po aq e vështirë, por në jo pak raste përfundojmë duke shkuar në të njëjtat vende ku kemi shkuar gjithmonë.
“Iconstyle.al” ju sugjeron që këtë fundjavë ta kaloni ndryshe në një destinacion turistik të cilin me siguri do të doni ta vizitoni dhe ta rivizitoni. Bëhet fjalë për lumin e Shalës, i cili ka një bukuri natyrore mahnitëse.
Foto marrë nga @albanian_discover
Ku ndodhet lumi i Shalës?
Ai buron rrëzë Alpeve shqiptare dhe ka një gjatësi rreth 37 km. Ndërsa grykëderdhja e tij është në liqenin e Komanit dhe pikërisht kjo zonë vitet e fundit është shndërruar në një ndër atraksionet turistike më tërheqëse të Alpeve tona.
Rruga për të shkuar deri tek lumi i Shalës është pak e gjatë, por kur të shikoni bukuritë e shumta që iu serviren do ta harroni lodhjen. Nëse niseni nga Tirana do të ecni me makinë rreth 2 orë në një rrugë relativisht të mirë deri tek Vau i Dejës. Më pas do të udhëtoni për rreth 1 orë në një rrugë të pashtruar për të shkuar deri tek zona e trageteve dhe varkave në liqenin e Komanit.
Oraret e tragetit janë në orën 6:00 dhe 9:00 të mëngjesit. Gjithashtu në dispozicion vihen edhe varka me rreth 20 vende, të cilat kushtojnë 5 euro për person.
Çfarë na ofron kjo zonë turistike?
Lumi i Shalës është një destinacion turistik që nga të gjithë përshkruhet si perla e bukurive të Komanit. Ngjyra karakteristike e lumit dhe shkëmbinjtë e thepisur, të cilët duken sikur prekin qiellin, të ofrojnë një panoramë mbresëlënëse.
Foto marrë nga @traveltime_agency
Ai është një atraksion i ri turistik pak i shkelur nga këmba e njeriut, i cili ka vetëm pak kohë që ka filluar të frekuentohet.
Përveçse ujit të kaltër, bukurisë mahnitëse përreth lumit kjo është edhe një zonë plot me vlera kulturore dhe historike.
Sipas gojëdhënave, princi Lekë Dukagjini i kaloi vitet e fundit të jetës në këtë zonë, ku gjen emërtime të tij si për shembull Guri i Lekës, një pikë strategjike që sheh luginën, nga ku mendohej që Dukagjini ruante vendin nga ardhja e turqve.
Kjo zonë turistike për vetë bukuritë që ka është karakterizuar edhe si “Tajlanda shqiptare”, duke tërhequr turistë të huaj dhe shqiptarë.
Foto marrë nga Google Maps
Çfarë mund të bëjmë këtë fundjavë tek lumi i Shalës?
Një shëtitje me varkë në lumin e Shalës është jo vetëm argëtuese, por edhe çlodhëse. Gjatë këtij udhëtimi do të keni mundësi të shijoni natyrën e mrekullueshme që e rrethon me shkëmbinjtë e thepisur që duket sikur prekin qiellin dhe me gjelbërimin relakuses.
Foto marrë nga @eeTimes
Për të gjithë të apasionuarit pas zhytjes ky është vendi ideal. Ju mund të merrni rrezet e para të diellit dhe mund të zhyteni në ujërat e kristalta të këtij lumi.
Ngjitja në majat përreth të ofron një pamje spektakolare dhe një adrenalinë që nuk e keni provuar më parë.
Për ta bërë sa më impresionuese këtë aventurë ju mund të kaloni edhe natën në zonën përreth lumit duke organizuar një piknik dhe duke u kënaqur me miqtë tuaj larg zhurmës dhe monotonisë për përditshme.
Foto marrë nga Google Maps
Çfarë duhet të marrim me vete?
Gjërat që iu duhen me vete janë rrobat e banjës, veshje sportive, kremra mbrojtës ndaj diellit dhe ushqime. Nëse do të kaloni edhe natën pranë lumit të Shalës dhe nuk keni gjetur një shtëpi në zonën përreth duhet të merrni me vete një çadër dhe veshje më të trasha pasi nata është e ftohtë.
Foto marrë nga Google Maps
