Fundjava është para dhe të gjithë kemi filluar të bëjmë planet se ku do ta kalojmë. Zgjedhja e një vendi të veçantë, relaksues por dhe argëtues është sa e lehtë po aq edhe e vështirë.
Mirëpo duke pasur parasysh se gjatë pushimeve të verës, pjesa jonë më e madhe kanë pushuar në zonat bregdetare “iconstyle.al” ju vjen në ndihmë duke ju sugjeruar një ndër vendet më të bukur shqiptare, jo vetëm me natyrën mahnitëse, por edhe me vlerat kulturore që mbart.
Bëhet fjalë për zonën turistike të Voskopojës, e cila të ofron mundësinë të kalosh një fundjavë ndryshe dhe tepër argëtuese.
Foto marrë nga @thealbanian.co.uk
Ku ndodhet kjo zonë turistik?
Voskopoja është një fshat turistik i cili ndodhet rreth 21 kilometra larg nga qyteti i Korçës, mbi një pllajë 1160 metra. Infrastruktura rrugore është tepër e mirë kështu që mund të shkoni pa problem me makinë. Udhëtimi me makinë nga Tirana deri në Voskopojë zgjat rreth 3 orë e gjysmë.
Çfarë na ofron kjo zonë turistike?
E shtrirë mes maleve dhe e rrethuar nga pyjet plot gjelbërim Voskopoja është një ndër zonët më përrallore të vendit tonë.
Fillimisht Voskopoja ka qenë qytet, madje dhe më i madh edhe se sa Korça, por më pas për shkak të infrastrukturës u la pas dore duke u shndërruar në një zonë komunale.
Foto marrë nga @thealbanian.co.uk
Ajo ka shërbyer si muzë për shkrimtarë, apo studiues e historianë shqiptarë për shekuj me radhë dhe vazhdon të jetë djepi i kulturës.
Nga pika të ndryshme të fshatit duken kambanat e tetë kishave dhe manastireve të mbetura, madje do të dëgjoni edhe tingëllimin e gëzueshëm dhe të trishtueshëm njëkohësisht të 25 kambanave.
Një zonë tepër e pasur me vlera të larta kulturore ndër shekuj, të cilat banorët e zonës janë mundur t’i shfrytëzojnë duke u përpjekur që t’ua servirin turistëve të shumtë vendas dhe të huaj.
Foto marrë nga @thealbanian.co.uk
Një vend piktores që të fton në çdo stinë, por veçanërisht gjatë stinë së vjeshtës ai është një mrekulli më vete.
Mund të gjeni gjithçka që nga natyra relaksuese, ajri i pastër, mikpritja dhe ushqimet tradicionale. E pamundur të largoheni pa provuar lakrorin me dy petë, mishin e pjekur apo petullat e fshira.
Foto marrë nga @visitvoskopoja
Çfarë mund të bëjmë gjatë kësaj fundjave në Voskopojë?
Ajri i pastër dhe natyra plot gjelbërim janë një ftesë e hapur për të kaluar një fundjavë relaksuese. Do të keni mundësi të vizitoni kishat dhe manastiret, por do të njiheni edhe me historinë që mbart kjo zonë, që ka çuditur edhe të huajt për nga mënyrat e organizimit.
Një drekë apo një darkë me ushqimet tradicionale do të jetë gjëja më e mirë që ju keni shijuar ndonjëherë.
Foto marrë nga @hotelmiqësia
Duke u ngjitur për në pjesën e kampit që ndodhet në këtë zonë ju mund të ushtroni edhe sportin e ecjes.
Gjatë mbrëmjes mund të shijoni tingujt e muzikës relaksuese të kitarës, që të paktë janë ata që nuk dinë t’i bien në këtë zonë.
Fotot marrë nga @vlashentsata
Çfarë duhet të marrim me vete?
Në këtë zonë mund të gjeni gjithçka që dëshironi, që nga ushqimi, hoteli, ciceronët kështu që gjërat e vetme që ju duhen janë veshjet pak më të trasha për në mbrëmje ,pasi temperaturat janë relativisht të ulëta, dhe një aparat fotografik për të realizuar fotot më të bukura që keni bërë ndonjëherë.
Foto marrë nga @life_in_albania
