Gjatë sezonit të verës të gjithë e kemi mendjen tek pushimet dhe mezi presim që të shkojmë nga njëri destinacion tek tjetri. Disa prej jush i keni përfunduar pushimet, ndërsa disa të tjerë këto ditë më në fund do të shijojnë periudhën më të bukur të vitit.
Për të gjithë ju që i keni përfunduar pushimet për këtë vit, por që fundjavat i shikoni si një mundësi për t’u arratisur drejt destinacioneve tuaja të preferuara “iconstyle.al” ju sugjeron që të eksploroni një ndër perlat turistike në Shqipëri që po çmend edhe të huajt, plazhi i Gjipesë.
Foto marrë nga @selin_erdogan67
Ku ndodhet ai?
Plazhi i Gjipesë apo siç njihet ndryshe, Kanioni i Gjipesë është një ndër plazhet më të bukura të rivierës shqiptare i cili ndodhet midis Vlorës dhe Himarës, rreth 50 kilometra në veri të kufirit me Greqinë.
Deri në Himarë rruga është e mirë, por 15 kilometrat e mbetura që duhet të përshkoni deri tek plazhi i Gjipesë janë një terren i vështirë që mund të përshkohen vetëm me fuoristradë apo më këmbë për rreth gjysmë ore.
Çfarë na ofron kjo zonë turistike?
Plazhi i Gjipesë, apo ndryshe Kanioni i Gjipesë është një plazh i virgjër i rivierës shqiptare që ka ngjallur edhe kureshtjen e turistëve të huaj. Kanioni nis që nga rruga tradicionale, mes fshatit Ilias e Jal, dhe përfundon në bregdet duke krijuar një oazë përrallor në bregun jugor.
Foto marrë nga Google maps
Disa thonë se kjo zonë turistike ka marr emrin Gjipe nga përcaktimi si “Gjiri i Perëndive”, por gjithsesi mbetet një gojëdhënë.
Ky plazh ndodhet rreth 50 kilometra nga kufiri grek dhe ngjan me gjiret e Kretës. Natyra magjike ku lartësitë e shkëmbinjve ndërthuren me blunë e qartë dhe transparente të detit janë pamja më e mrekullueshme që mund të ofrohet.
Foto marrë nga @visit.balkan
Çfarë mund të bëjmë këtë fundjavë tek?
Një vend përrallor që të ofron mundësinë që të lahesh në ujërat e kristalta apo të ecësh në kanionin e saj, ku herë pas here formacione të ndryshme shkëmbore formojnë pamje mahnitëse. Ndërsa gjatë natës Gjipeja konsiderohet si vendi ideal ku mund të shohësh dallgët e detit nën yjet vezullues.
Tifozët e sporteve mund ta përdorin këtë kanion për të ushtruar sportin e tyre të preferuar, dhe për të përjetuar emocione të forta. Në shtegun e ngushtë të kanionit spektakolar mund të bëni kacavarje, kanioning dhe ngjitje shkëmbore.
Foto marrë nga @phildonachie
Një vend që të jep mundësinë të përjetosh një fundjavë aventureske, ku jo vetëm do të bëni plazh, por do të njiheni edhe me gojëdhënat që e shoqërojnë këtë destinacion magjik.
Të shumtë janë ata turistë të cilët zgjedhin ta vizitojnë këtë plazh vetëm apo të organizuar nëpërmjet agjencive të ndryshme turistike.
Foto marrë nga @phildonachie
Çfarë duhet të marrim me vete?
Gjërat që ju duhet të merrini me vete janë rrobat e plazhit, kremrat mbrojtës, por dhe një telefon me “full battery” apo një aparat të mirë fotografik për të realizuar fotot më të bukura me të cilat do të çmendni gjithë Instagramin.
Foto marrë nga @nilalleshaj
*Kujdes! Ndalohet riprodhimi i këtij materiali pa lejen e redaksisë së Iconstyle.al
