Shumëkush prej jush mund të jetë me pushime buzë detit, por ka të tjerë (si ne) që janë përpara kompjuterit ditë e natë e mezi presin të dielën e “bekuar” për të kompesuar ditët e humbura. Ndaj nëse ende nuk e keni vendosur se ku do të udhëtoni këtë fundjavë, “iconstyle.al” sugjeron një ndër brigjet më të adhuruara nga turistët shqiptar dhe të huaj, Plazhin e Gjeneralit, vetëm pak kilometra larg kryeqytetit.
Ku ndodhet ai?
“Plazhi i Gjeneralit” shtrihet në detin Adriatik, pranë fshatit Bardhorë të Komunes Synej, 10 km larg qytetit të Kavajës. Rruga që të shpie drejt një deti të thellë dhe të kaltër, shkëputet nga autostrada Kavajë-Durrës, një rrugë disi e ngushtë dhe me gropa, në hyrje të fshatit Synej dhe pas disa minutash, shfaqet gjiri i paprekur i Adriatikut.
Çfarë na ofron kjo zonë turistike?
Me një vijë bregdetare prej tre kilometrash, plazhi i Gjenerali gjendet në komunën e Synejt. Ai ka një harmonizim perfekt mjedisor, ku janë të ndërthuruar peisazhi malor me atë bregdetar, çka e bën të dallueshëm këtë plazh nga të tjerët, në zonën e Kavajës. Pjesa shkëmbore dhe ajo ranore janë në simbiozë më njera-tjetrën duke ia shtuar së tepërmi bukuritë natyrore kësaj zone.
Çfarë mund të bëjmë këtë fundjavë tek Plazhi i Gjeneralit?
Për të gjithë personat që adhurojnë peshkimin, Plazhi i Gjeneralit është vendi perfekt për ta ushtruar këtë pasion. Gjithashtu, nëse deti është me dallgë, atëherë mos ngurroni për të bërë pak sërf! Ndër të tjera, mund të eksploroni zonën përreth duke ecur në maj të kodrës, për të parë pamjen e plotë piktoreske të detit.
Çfarë duhet të marrim me vete?
Patjetër që duhet të merrni me vete rrobet e plazhit, kremin mbrotjës kundra diellit dhe shumë pije freskuese, ndoshta edhe ushqim me vete pasi Plazhi i Gjeneralit nuk ofron shumë restorante.
Pak histori:
Plazhi i Gjeneralit e mori emrin nga një gjeneral italian i Luftës së Dytë botërore, i cili kishte ardhur në Shqipëri në fillim të viteve 40, kur Italia pushtoi Shqipërinë. Gjatë ekspeditave në zonën e Kavajës, ai ndeshi në një gji të mrekullueshëm rreth 400 metra të gjerë, që puthej nga një det thellësisht blu. Pak kohë pasi u kthye në Itali, mori familjen e tij dhe e mësyu gjirin edhe njëherë, por kësaj radhe me jaht, nga deti.
*Kujdes! Ndalohet riprodhimi i këtij materiali pa lejen e redaksisë së Iconstyle.al
Burimi: Iconstyle.al
