Udhëtimi i ynë i kësaj fundjave është vetëm 1 orë larg qendrës së Tiranës. Bëhet fjalë për Liqenin e Bovillës nga i cili furnizohet me ujë të pijshëm pjesa më e madhe e kryeqytetit. Ai na ofron një peisazh relaksues që na fton drejt aventurave të shumta.
Foto marrë nga “Mjedisi sot”
Ku ndodhet Liqeni i Bovillës?
Vetëm 20 km larg nga qendra e kryeqytetit ndodhet liqeni i Bovillës. Ai është ujëmbledhësi më i madh i rrethit të Tiranës dhe furnizohet me ujë nga lumi Tërkuzë, i cili buron nga pjesa veriore e malit me Gropa dhe ujërat e shirave të kodrave përreth.
Liqeni i Bovillës ndodhet në Veri-Lindje të Tiranës, midis dy vargmaleve kryesore. Në perëndim kufizohet me malin e Gamtit dhe Brarit, ndërsa në juglindje nga mali i Dajtit.
Rruga nga Tirana deri në fshatin Zall Herr është e asfaltuar dhe më pas është një segment rural, por që është i kalueshëm edhe për makinat e vogla. Kështu që shumë mirë ju mund të shkoni deri tek liqeni me makinë nëse nuk dëshironi që të ecni më këmbë.
Çfarë ofron Liqeni i Bovillës?
Duke pasur parasysh shtrirjen e tij dhe faktin që rrethohet nga male të jep mundësinë që të shijosh pamjen spektakolare të peisazhit mahnitës që ofrohet. Ajo konsiderohet si zona e aventura ku ndërthuren bashkë terreni i vështirë, gjelbërimi dhe liqeni.
Foto marrë nga @fjordaLLUKMANI
Çfarë mund të bëjmë gjatë kësaj fundjavë në Liqenin e Bovillës?
Natyra relaksuese që rrethon Liqenin e Bovillës është një ftesë për të kaluar një fundjavë ndryshe larg zhurmave dhe ajrit të ndotur. Mund të merrni rrezet e para të diellit buzë liqenit, apo dhe mund të eksploroni kodrat që e rrethojnë atë.
Nëse jeni i pasionuar pas çiklizmit kjo është zona ideale. Ne ju sugjerojmë që deri në Zall Herr të shkoni me makinë dhe pjesën tjetër ta bëni me biçikletë. Duke pasur parasysh terrenin e vështirë që e shoqëron këtë zonë, ecja me biçikletë është një eksperiencë që të mbush plot me adrenalinë. Të shumta janë grupet e organizuara të cilat zgjedhin të bëjnë çiklizëm në këtë zonë shumë pranë qendrës së kryeqytetit.
Foto marrë nga SHFRD
Ju gjithashtu mund të praktikoni edhe sportin e kacavjerrjes apo të ecjes malore “hiking”.
Foto marrë nga Trip Advisor
Mund të realizoni edhe një piknik me një grup shoqëror apo me familjen.
Foto marrë nga SHFRD
Çfarë duhet të marrim me vete?
Në qoftë se ju zgjidhni që ta bëni më këmbë rrugën nga Zall Herri deri tek liqeni ju sugjerojmë që të visheni sa më sportiv dhe të merrni me vete ujë dhe fruta, në mënyrë që të jeni të hidratuar dhe të keni sa më shumë energji për të realizuar ngjitjen, duke pasur parasysh edhe terrenin e vështirë.
Nëse doni të merrni rrezet e para të diellit duhet të keni me vete rrobat e banjos, ndërsa nëse do të zhvilloni një piknik sigurohuni që çdo ushqim apo mjete të tjera që iu duhen t’i merrni me vete.
Nëse keni një biçikletë në shtëpi ju sugjerojmë që ta merrni me vete pasi adrenalina që do të përjetoni do të jetë e madhe.
Foto marrë nga Google Map
