Shumë prej jush tashmë keni marrë pushimet dhe po argëtoheni në vendet më të bukura turistike që keni zgjedhur, mirëpo po aq të shumtë janë edhe ata persona të cilët janë duke punuar në zyrë, por mendjen e kanë se ku do ta kalojnë fundjavën.
“Iconstyle.al” ju vjen në ndihmë këtë fundjavë duke ju sugjeruar një ndër destinacionet turistike shqiptare më të bukura dhe të lakmuar edhe nga turistët e huaj. Bëhet fjalë për gjirin e Kakomesë, në të cilin do të gjeni gjithçka dëshironi për një fundjavë super të bukur.
Foto marrë nga @explorevlora
Ku ndodhet ai?
Gjiri i Kakomesë ndodhet në bregdetin e Jonit, në perëndim të fshatit Nivicë Bubar, midis Kapo Qefalit dhe Krorzës. Ai është pjesë e komunës së Lukovës dhe karakterizohet si një ndër gjinjtë detar më piktoresk jo vetëm në Shqipëri, por edhe në Mesdhe.
Itinerari që do t’u shoqëroj në këtë udhëtim është ndër më interesantët dhe i gjithi bëhet me makinë pasi rruga është relativisht e mirë dhe ndodhet vetëm 10 km larg nga Saranda. Vizitohet duke ndjekur degëzimin e rrugës kombëtare Borsh-Sarandë, nga fshati Nivicë-Bubar-Gjiri i Kakomesë.
Çfarë na ofron kjo zonë turistike?
Gjiri i Kakomesë dhe zona përreth tij karakterizohet nga një natyrë piktoreske që na fton të gjithë të relaksohemi. Ai futet rreth 550 metra në brendësi të tokës dhe ka një gjatësi afro 2 kilometra. Nga të dyja anët e gjirit bregdeti lartësohet nga ngritje me lartësi 500 metra, që bien thikë mbi det duke formuar rrëpira, shkëmbinj të zhveshur, kepa shkëmbinjsh mbi ujorë e nën ujorë të veshur me korale, guaska, iriqë e bimësi ujore me forma e ngjyra të ndryshme, me ujë të pastër e të tejdukshëm.
Foto marrë nga @dorotours
Plazhi është i tipit zallor dhe uji në këtë zonë sipas studimeve të ndryshme renditet në një ndër më të pastërit. Në pjesën jugore të tij ngrihet një shpat malor, i cili është i veshur me bimësi natyrore, ndërsa në pjesën veriore të tij ndodhet një pjesë shkëmbore e zhveshur, por që ka shkurre të vogla.
Në lindje të gjirit të Kakomesë ka dy manastire të cilat shoqërohen nga një histori shumë e lashtë.
Foto marrë nga @robertvasicek
Në këtë gji detar janë bërë investime të shumta vitet e fundit dhe po synohet ngritja e një fshati turistik për turistë nga e gjithë Europa duke qenë se ai është klasifikuar si një ndër gjinjtë detar më të bukur në Mesdhe.
Çfarë mund të bëjmë këtë fundjavë tek Gjiri i Kakomesë?
Një zonë turistike ku mund të gjeni gjithçka që dëshironi, natyrën relaksuese, ujin e kristaltë, turizmin kulturor e historik, por edhe mikpritjen e banorëve të kësaj zone.
Foto marrë nga @traveltime.tours
Gjatë kësaj fundjave ju mund të shijoni ujin e pastër dhe të merrni rrezet e diellit në plazhin zallor. Gjithashtu mund të vizitoni edhe dy manastiret që ndodhen në këtë zonë.
Mbrëmja me siguri që do të jetë po aq e këndshme sa edhe dita që kaluat në këtë zonë turistike në shoqërinë e miqve apo familjarëve tuaj. Natën mund të zgjidhni ta kaloni në një ndër shtëpitë e fshatit turistik që ndodhet aty pranë.
Foto marrë nga @dorotours
Çfarë duhet të marrim me vete?
Me vete ju duhen vetëm rrobat e banjos dhe kremrat mbrojtës ndaj diellit, pasi gjithçka tjetër do të gjeni në këtë zonë.
Video marrë nga @kameleonstudio
*Kujdes! Ndalohet riprodhimi i këtij materiali pa lejen e redaksisë së Iconstyle.al
