Përgatituni për temperatura përvëluese! Një tjetër valë e të nxehtit afrikan pritet të godasë Shqipërinë duke nisur nga fundjava, duke e çuar termometrin deri në 40°C në hije.
Sipas sinoptikanit Hakil Osmani, kulmi i të nxehtit pritet në fundjavë, veçanërisht në Elbasan dhe Berat, ku temperaturat do të arrijnë nivelet maksimale. Por nuk shpëtojnë as Tirana, Shkodra dhe Gjirokastra, ku pritet të regjistrohen deri në 39°C. Në zonat e ultësirës, termometri do të qëndrojë mes 36 dhe 38 gradë.
Kjo valë pritet të zgjasë për të paktën një javë, deri në mesin e javës së ardhshme dhe prapë nuk ka shenja lehtësimi. Në disa zona të izoluara, vlerat ekstreme mund të mbeten deri në 40°C edhe më tej.
Meteorologët paralajmërojnë se ky gusht po devijon ndjeshëm nga mesatarja, me temperatura rreth 6 gradë më të larta se norma sezonale, duke sjellë ditë të gjata e të thata që sfidojnë çdo durim.
Kujdes! Hidratimi, qëndrimi në hije dhe shmangia e ekspozimit në diell gjatë orëve të pikut janë thelbësore.
