Një tërmet i fuqishëm ka goditur Kroacinë pasditen e së martës. Sipas Qendrës Sizmologjike Evropiane-Mesdhetare, lëkundjet ishin me magnitudë 6.4 të shkallës Rihter. Si pasojë e lëkundjeve të forta janë dëmtuar shumë banesa dhe ka disa viktima. Deri më tani nuk dihet numri i saktë i personave që kanë humbur jetën, por dyshohet se mes tyre është edhe një fëmijë.
Epiqendra e tërmetit ishte 3 kilometra nga qyteti Petrina, ndërsa lëkundjet u ndjenë në të gjithë Kroacinë. Tërmeti ishte aq i fortë sa u ndje edhe në Dubrovnik. Lëkundjet u ndjenë edhe në Serbi e Itali. EMSC deklaron se ky është tërmeti më i fortë që ka goditur Kroacinë këtë vit.
#Potres v živo v Državnem zboru..😳😳😳 pic.twitter.com/kwfv1nYdRj
— MARKO BANDELLI (@BandelliMarko) December 29, 2020
Pamjet që vijnë nga mediat e huaja janë vërtetë rrëqethëse, teksa dëgjohen britmat e njerëzve që ndodhen nën rrënoja. Ndërkohë, policia u ka bërë thirrje qytetarëve që të largohen nga ndërtesat. Nga raportimet e para, thuhet se si pasojë e lëkundjeve, gjysma e qytetit ka mbetur e shkatërruar.
Në të njëjtën zonë, ditën e djeshme ra një tërmet me magnitudë 5.2 të shkallës Rihter dhe disa paslëkundje u ndjenë edhe ditën e sotme. Sizmologët kanë paralajmëruar të gjithë njerëzit që të qëndrojnë larg nga banesat e vjetra, sepse në rast të ndonjë paslëkundje tjetër mund të shkatërrohen plotësisht.
