Përpos infektimeve të reja, vala e dytë e koronavirusit këtë dimër pritet të rrisë edhe numrin e bizneseve të falimentuara si pasojë e krizës ekonomike dhe lënies pas dore nga qeveria.
Deri në fund të qershorit në vendin tonë numri i të papunëve ka qenë 166 mijë e 127 persona.
Shoqatat kryesore të biznesit dhe Dhomat e Tregtisë parashikojnë që në muajt shtator-tetor-nëntor të ketë një numër akoma më të madh falimentimesh të bizneseve fason, turizmit, bareve, restoranteve dhe transportit, që do të shoqërohen me rritje të mëtejshme të papunësisë.
Vera nxori në pah pasojat reale nga izolimi gati tremujor i këtyre bizneseve dhe faktin që paketat mbështetëse të qeverisë, nuk kanë mjaftuar që mijëra biznese të mbijetojnë në treg.
Ulja e të ardhurave deri në 70% për hotelet, 50 deri në 60% për baret dhe restorantet për muajin gusht dhe mungesa e rimbursimeve për klubet e natës që vijojnë të jenë mbyllur sipas Monitor.al, janë tregues të qartë se jemi vetëm në hapat e parë të një krize të madhe ekonomike.
Pjesa më e madhe e restoranteve në vend të cilat kanë marrë ambientin me qira, po hasin mjaft probleme në sigurimin e të ardhurave mjaftueshëm sa për të paguar qiranë, punonjësit apo të bëjnë furnizimin. Shteti gjithashtu nuk ka bërë asnjë hap, për reduktimin e TVSH-së, shtyrjen e taksave, dhënien e kredive të buta, apo minimumi mbulimin e këtyre qirave, por vijon me gjobat selektive të lokaleve të dasmave, si për të thënë se po zbatohet akti normativ.
E vetmja rrugë që kemi
Ndaj e vetmja rrugë që kemi në mënyrë që t’i shpëtojmë krizës dhe falimentimit masiv të këtyre bizneseve, janë plotësimi i kërkesave të tyre që janë të qarta:
-ulja e taksave në nivel kombëtar,
– rimbursimi i qirave për strukturat e shërbimit të mbyllura në karantinë,
– subvencionimi i kostove për blerjen e makinerive të masonëve, që kërkojnë të prodhojnë materiale njëpërdorimshme për t’i shpëtuar krizës,
-instrumente nxitës për rritjen e konsumit dhe fuqisë blerëse,
-si dhe politika mbrojtëse për fermerin dhe industrialistin shqiptar.
“Shoqatat dhe biznesi janë lodhur, duke paraqitur propozime që nuk realizohen”, shprehet Alban Zusi, President i Qendrës së Eksporteve Shqiptare, i cili thekson se duhet të ngrihet edhe një qendër shkencore për të analizuar dhe për të zgjidhur problemet e biznesit, pasi shumë prej tyre nuk janë adresuar dhe kjo e ka futur procesin në një rreth vicioz.
Edhe Kosova ka mbetur mbrapa!
Hotele, Restorante, Kafene në Kosovë po i vuajnë pasojat ekonomike të pandemisë, pasi xhiroja në to është ulur me 60%. Eksperti i ekonomisë, Safet Gerxhaliu, tha për “Monitor Ekonomi” se çdo ditë ka mbyllje të bizneseve dhe njerëz që mbeten të papunë. Në krahasim me vendet e rajonit, ai nënvizon se Kosova ka mbetur shumë prapa, pasi disa shtete po zbatojnë paketën e tretë dhe të katërt në mbështetje të ekonomisë dhe biznesit.
“Në Kosovë jemi ende te paketa emergjente e miratuar në mars të këtij viti e cila, tani, pas rishikimit të buxhetit, ka filluar të paguhet. Jemi me muaj të tërë vonesë dhe kjo është koha kur duhet të ndahet politika nga ekonomia, sepse qytetarët kanë nevojë për ndihmë”.
Po çfarë sugjerohet?
Në këtë periudhë vështirësi ekonomike, është e domosdoshme të zbatohen paketa të tjera financiare në ndihmë të biznesit dhe të të punësuarve, qoftë edhe duke rritur nivelin e borxhit deri në 60% të Prodhimit të Brendshëm Bruto.
Maqëdonia e Veriut bën diferencën, si i erdhi në ndihmë turizmit
Ndërkohë që në Shqipëri, përpjekjet për të ringritur turizmin, lanë shumë për të dëshiruar, në Maqedoninë e Veriut, paketat e ndihmës financiare janë zbatuar në ndihmë të sektorit të turizmit dhe prodhimit. Qeveria ka ofruar për sektorin e turizmit kredi pa interes si dhe ka shpërndarë kuponë për punonjës me paga minimale që të përdoren për turizëm.
Kështu, u ofruan kuponë për familjet që nuk kanë të ardhura mujore më shumë se 15.000 denarë.
“Pasi u akordua një pagë minimale për muajin qershor për subjektet që kanë pasur humbje gjatë karantinës, tashmë janë në fazë realizimi 95 mijë kuponë për turizëm në vend, me vlerë 100 euro. Gjithashtu janë në fazë realizimi edhe kuponë për të blerë produkte vendase në vlerë prej 26 milionë eurosh”, rapoton Monitor.
Kreu i Shoqatës së Turoperatorëve dhe Agjencive Turistike, z. Rexhep Kasmi tha pak ditë më parë për “iconstyle.al”, se shteti shqiptar nuk i stimuloi shqiptarët që të pushonin në vendin e tyre ashtu siç bënë shumë shtete fqinje, pavarësisht propozimit të turoperatorëve.
Ndaj turizmi është një ndër sektorët më të goditur pasi roli i qeverisë për ta ringritur, mungoi në çdo drejtim.
/Iconstyle.al
