Baret dhe restorantet janë sektori më i goditur nga pandemia, që i detyroi ato të mbyllin dyert që në javën e dytë e marsit deri më 18 maj!
Shqipëria ka rreth 18 mijë bare e restorante (82% e të cilave janë bar-kafe), sipas INSTAT, me mbi 50 mijë të punësuar, ose rreth 10% të të punësuarve në sektorin privat në total.
Por vetëm në tremujorin e parë të vitit, numri i të punësuarve në këtë aktivitet ra me 21.7% dhe fondi i pagave u tkurr me rreth 20.6%, duke shënuar performancën më të keqe nga të gjithë sektorët e shërbimeve sa i takon punësimit, shkruan Monitor.al.
Edhe pse ka kaluar muaji që kur baret dhe restorantet janë hapur, ecuria nuk duket shumë pozitive. Operatorët e tregut pohojnë se konsumi dhe frekuentimi është i ulët, sidomos për restorantet, ndërsa klubet e natës, që kishin dhe konsumin më të lartë, vijojnë të jenë të mbyllura.
“Nëse qeveria nuk ndërhyn me grante apo subvencionim të qirasë, këto biznese do të falimentojnë. Flasim për struktura që kanë kushtuar me qindra apo mijëra euro dhe me kosto të lartë në mirëmbajtje”, pohon Jahaj, Enri Jahaj, anëtar i bordit drejtues të Shoqatës të Bareve, Restoranteve dhe Klubeve.
“Ne si shoqatë parashikojmë që do të ketë një falimentim në masë, sidomos bizneset familjare të ngritura me investime minimaliste nuk do t’i mbijetojnë dot krizës dhe sjelljes sonë ndryshe”, ka pohuar më herët ai për Monitor.al.
Një tjetër problem është respektimi i protokollit të masave të mbrojtjes nga COVID-19 që lë për të dëshiruar. Në nëj prononcim për “iconstyle.al” Jahaj tha se qytetarët nuk zbatojnë rregullat duke rrezikuar kështu jo vetëm njëri-tjetrin, por edhe gjobitjen e menaxherëve apo pronarëve të lokaleve.
“Klientët nuk e venë në zbatim protokollin dhe distancimin”, shprehet Jahaj duke nënkuptuar se ka pasur dhe vështirësi në këtë drejtim me rregullat e reja, që nuk po respektohen.
Por si parashikohen muajt e verës? Situata e vështirë ekonomike në vend pritet të ndikojë edhe në sektorin e bareve dhe restoranteve, për të mos folur për uljen e numrit të turistëve këtë vit, që përkthehet në rënie klientele.
“Muajt e verës parashikohen të vështirë pasi nuk pritet të ketë dhe turistë dhe me gjendjen e deritanishme klientët kanë filluar të kursejnë e të përgatiten për muajt më të vështirë që pritet të vijnë shtator, tetor ku mund të kemi rimbyllje përsëri”, shprehet Jahaj.
Kriza në këtë sektor do të vijë duke u përshkallëzuar duke qenë se Shqipëria mban rekordin në botë me numrin e bareve (518 bare) për çdo 100 mijë banorë.
Vendi ynë lë shumë pas vendet e Ballkanit Perëndimor. Pas Shqipërisë renditet Portugalia, e cila kishte 427 bare për çdo 100 mijë banorë. Në top 5 vendet me numrin më të lartë pas Portugalisë, është Spanja me 392 bare për 100 mijë banorë, Greqia me 343, Kroacia me 240 dhe Italia me 211. Vendet e rajonit kanë shumë më pak bar-kafe sesa ne. Psh, Serbia ka vetëm 9, ndërsa Maqedonia 47.
/Monitor.al
