Për ironi të fatit, ashtu siç titullohej një prej këngëve të tij të pavdekshme “Last Christmas”, edhe Krishtlindja e djeshme ishte e fundit për legjendën angleze të muzikës pop, George Michael. Këngëtari legjendar u nda nga jeta në shtëpinë e tij në moshën 53-vjeçare.
Ylli i muzikës, i cili nisi karrierën e tij me grupin “Wham!” në 1980-n dhe pati shumë sukses si performues solo, “u nda nga jeta paqësisht” në ditën e Krishtlindjeve, në shtëpinë e tij në Londër.
Menaxheri i tij, Michael Lippman, tha se ndërroi jetë pas një ataku në zemër.
Policia e Luginës së Tamizit tha se po e trajton vdekjen e Micheal si të pashpjeguar, por nuk ka rrethana të dyshimta. Sipas autoriteteve britanike, ekzaminimi “post mortem” do të shpjegojë gjithçka, ndërsa mediat që tani spekulojnë se ikona e muzikës humbi jetën pas problemeve me zemrën.
Homazhe për Micheal kanë ardhur nga e gjithë bota e muzikës dhe nga miliona fansa në të gjithë planetin.
Kush ishte George Michael?
George Michael lindi në vitin 1963, në veri të Londrës, me emrin Georgios Kyriacos Panayiotou dhe gjatë karrierës së tij fantastike që zgjati thuajse katër dekada shiti mbi 100 milionë albume. Ai u bë i famshëm në duetin Wham me shokun e shkollës Andrew Ridgeley, me të cilin dolën katër herë në vendin e parë të hitparadave britanike, para se ai të këndonte solo dhe të fitonte famë botërore me albumin Faith në vitin 1987.
Hitet si “Careless Whisper” dhe “Fastlove” e bënë George Michael të dashur për njerëzit anembanë botës, ndërsa gjithashtu konsiderohet si njeriu që solli një frymë të re në muzikën “pop”. Organizatorët e çmimeve Grammy, nga të cilët Michael fitoi dy, thanë se talenti i tij i jashtëzakonshëm pati një impakt të thellë në të gjithë artistët në botë dhe kontributi i tij artistik do të jetojë përgjithnjë.
Me kalimin e viteve, George Michael nisi të bëjë bujë për arsyet e gabuara, si drejtim mjeti në gjendje të dehur, përdorim droge madje dhe 8 javë burg për një aksident me makinë. Megjithatë, këto probleme nuk e pakësuan kurrë adhurimin e fansave për të, të cilët thonë se vdekja e tij është një humbje e thellë për të gjithë, artistë apo jo.
Burimi: BBC
