Gjykata ka dhënë ditën e sotme dënimin me 15 vite burg për efektivin e policisë, Nevaldo Hajdaraj, i cili është i akuzuar për vrasjen e Klodian Rashës. Për shkak të gjykimit të shkurtuar, dënimi ndaj Hajdarajt ulet në 10 vite burgim.
Hajdaraj nuk tha asgjë, por avokati shprehu pendesë dhe në emër të klientit i dha ngushëllimet familjes.
Lidhur me këtë, babai i 25-vjeçarit të vrarë në dhjetor të vitit që lamë pas, e ka komentuar me indinjatë të madhe vendimin e dhënë nga Gjykata e Tiranës.
Qazim Rasha mes zhgënjimit të madh nga padrejtësia që mori sot dhe dhimbjes së humbjes së të birit i bëri thirrje qytetarëve dhe gazetarëve të ruajnë fëmijët.
“Ju kisha thënë që do vijë momenti që do t’i themi disa gjëra. Sot është momenti. Dua t’ju falënderoj ju nga zemra për punën fisnike që keni kryer që nga dita e parë deri tek dita e sotme. Falë jush shumë gjëra morën rrugë, pavarësisht inskenimeve që u munduan me të gjitha format. Falënderoj çdo person që ka trokitur në derën time nga dita e parë deri sot në ditën e 216-të, falënderoj çdo qytetar që mbushën sheshet duke thirrur ‘Unë jam Klodiani’. Ardhja ime që nga dita e parë ka qenë jo krejt pa domethënie. Ishte një makabritet që e kreu një sekt që çdo lloj epiteti mund të vendosësh vetëm epitetin njeri jo. Ai për të cilin paguan taksa, një lloj huligani, padrejtësisht vret një djalë të ri në rrugicën e shtëpisë së vetë.
Pavarësisht alibisë, ngjarjes, tragjedisë, arriti deri aty sa viktima të marrë pozicionin e kriminelit dhe krimineli është veshur me petkun e viktimës. Është një ngjarje që ka tronditur jo vetëm themelet e familjes sime, por të mbarë shoqërisë, por edhe shtetit. Kjo njollë e zezë nuk do i hiqet. Mesazhi im është një, fëmija im ik, u varros, por fëmija juaj, gjaku është njëlloj si i të gjithëve.
Mendoja që me këtë rast të shërbejë një shembull për këta që janë gjallë, të shërbejë si simbolikë që edhe ju kini kujdes ruajini fëmijët tuaj.
Si mund ta quash drejtësi, kur çdo gjë është e qartë dhe me një të rënë të lapsit i jep gjykimin e shkurtuar?! Mendoj dhe besoj tek drejtësia e re që po ngrihet”, deklaroi babai i Klodian Rashës.
Ai u pyet nëse do ta apelojë vendimin e Shkallës së Parë dhe për këtë tha se nuk ka besim.
“Unë e kam kërkuar drejtësinë që ditën e parë, por me këtë lloj drejtësie nuk besoj se mund ta gjej as unë, askush”, deklaroi Qazim Rasha.
Të vritet njeriu para kamerave që shërbejnë si një dëshmi e qartë e makabritetit nga ata që duhet të na ruajnë e të na mbrojnë dhe të çohet peshë gjithë vendi nga protestat dhe si përfundim autori i kësaj ngjarje të rëndë që tronditi mbarë vendin të dënohet vetëm me 10 vite burg, kjo është një tregues i qartë i padrejësive që bëhen nga vetë sistemi i drejtësisë.
