iconstyle.al > Aktualitet > Krimi i pasionit në “Don Bosko”: Publikohet rezultati i hetimit ndaj policëve që ndoqën denoncimet

Krimi i pasionit në “Don Bosko”: Publikohet rezultati i hetimit ndaj policëve që ndoqën denoncimet

Pak ditë më parë kryeqyteti u trondit nga një krim i dyfishtë, ku një 31-vjeçar vrau me armë zjarri një 19-vjeçare dhe më pas qëlloi për vdekje edhe veten e tij. 4 ditë pasi ndodhi  krimi, Shërbimi për Çështjet e Brendshme dhe Ankesat nisi verifikimin e të gjithë punonjësve të policisë të cilët kishin trajtuar çështjen.

Vrasja e 19-vjeçares, Xhuljeta Çuni nga Xhaferr Mata ishte një ngjarje e paralajmëruar duke qenë se ajo e kishte denoncuar në polici të riun. Xhuljeta e kishte denoncuar në Komisariatin nr.3 Xhaferrin, por sipas familjarëve të saj policia nuk mori asnjë masë.

SHÇBA ka kërkuar dje dokumentacionin e nevojshëm në Komisariatin nr.3 në lidhje me denoncimin për përndjekje që ka bërë një muaj para vrasjes 19-vjeçarja Çuni. Gjithashtu mësohet se janë pyetur punonjësit e Policisë që janë marrë me rastin, si dhe u verifikua edhe praktika e ndjekur prej tyre dhe vendimi për të proceduar në gjendje të lirë Xhaferr Matën.

Për veprën penale të “përndjekjes” në rastet e mëparshme, i dyshuari është ndaluar ose arrestuar në flagrancë, ndërsa në këtë rast është hetuar në gjendje të lirë.

Mirëpo pas hetimit të bërë nga SHÇBA, është vlerësuar se nuk ka “Asnjë përgjegjësi penale për punonjësit e Policisë për ngjarjen në rrugën ‘Don Bosko’”.

Njoftimi i plotë

Struktura e Shërbimit për Çështjet e Brendshme dhe Ankesat (SHÇBA), Tiranë nisi verifikimet për veprimet apo mosveprimet e Policisë, menjëherë pas ngjarjes së ndodhur në datën 8 Qershor 2018, në rrugën “Don Bosko”, ku shtetasi Xh.M vrau me armë zjarri shtetasen 19-vjeçare XH.Ç e më pas veten.

SHÇBA kreu verifikimet e plota për të këqyrur veprimet policore, duke nisur me intervistimin e punonjësve, këqyrje libra shërbimi, dokumentacioni, kamera etj.

Nga gjithë verifikimet e kryera ka rezultuar se Policia ka marrë kallëzim në datën 7 maj 2018 nga shtetasja XH.Ç për përndjekje. Materialet janë referuar në Prokurorinë e Rrethit Gjyqësor Tiranë dhe pas vlerësimit të kallëzimit nga Prokuroria është bërë regjistrimi i procedimit penal, për të vijuar më pas me hetimin. Pas kallëzimit, Prokuroria nuk i ka deleguar veprime të tjera shtesë Policisë, duke vijuar vetë me veprimet hetimore.

Policia e Shtetit nuk ka marrë asnjë ankesë tjetër apo t’i jetë bërë prezent ndonjë shqetësim nga shtetasja XH.Ç., pas kallëzimit të datës 07.05.2018.

Pra, nga verifikimet e kryera nga SHÇBA dhe analizimi i dokumentacionit të administruar, nuk rezulton se punonjësit e Policisë që kanë trajtuar ngjarjen të kenë konsumuar elementë të ndonjë vepre penale, duke shpërdoruar detyrën.

Ministria e Brendshme dhe Policia e Shtetit mbetet e gatshme për të pritur çdo ankesë apo informacion për shkelje të konstatuara nga punonjës të Policisë, duke rikujtuar numrin ku mund të denoncohet falas 0800 90 90.

Burimi: Panorama

Nuk janë emaile të mërzitshme!

Regjistrohu për të zbuluar të vërtetat e të famshmëve dhe trendet e momentit.